呢個禮拜日有三項錦標舉行，當中第五場跑保良局盃，呢場有隻「善傳千里」角逐，當中有唔少成員都係保良局總理，有機會自己人捧番自己所舉辦嘅盃，講真呢場「善傳千里」係機會馬，用埋潘頓決心昭然若揭。另兩個盃賽，則有第七場嘅三級賽洋紫荊短途錦標，仲有第八場皮亞士紀念盃，講戲碼當然係洋紫荊短途錦標，蔡廄本來有「華恩庭」、「喜悅繽紛」及「首映」三駒報名，但「華恩庭」排位期間退出比賽，蔡約翰剩番「首映」同「喜悅繽紛」雙箭頭出擊，上場前者有運險勝，呢次莫雷拉再鬥田泰安，兩兄弟會否移形換影真係好難講。不過昨日有個消息可能對讀者有多少參考價值，話說馬房通常會安排跑大賽嘅馬匹喺地下最就腳馬格，方便倉主經常可以睇到，今次「喜悅繽紛」同「首映」都唔例外，不過，「首映」唔知係咪俾人谷得太勁嘅關係，竟然喺馬格內撩「喜悅繽紛」打交，而「首映」咀裡經常發出胡胡聲響，由於兩個馬格都有鐵欄相隔，所以真正打交鏡頭就見唔到，呢個時候「首映」脾氣進一步惡化，竟然打起雙飛，而其中一隻後蹄甲因此被打鬆咗。副練伍鵬志即急召釘甲師傅再替呢次馬重新上甲。馬房為免「喜悅繽紛」及「首映」再度擺款想打交，副練就將「喜悅繽紛」帶到地下最尾嘅馬格安置，「首映」就安排前一啲，變成兩隻馬喺馬房一頭一尾，所以兩駒喺比賽前都唔會再有機會碰頭，而兩駒中當然以「首映」最省鏡。