十三少韋達雖然風光不再，不過間中亦有佳作。儘管現時各馬房對佢支持嘅力度有限，但一些舊老細依然十分照顧佢，好似今次喺第九場列陣嘅「孟買之星」，呢位馬主同十三少交情好好，當然係源於昔日嘅合作關係，因為呢位馬主過往有唔少好馬，例如「火焰之星」、「贏到爆」及「利錢伯爵」等。不過數最出色嗰隻，一定係二○一○年贏打吡嘅「極品絲綢」，其實，韋達跑打吡都唔係咁好戰績，二○○五年佢將隻「爪皇凌雨」讓咗出嚟，自己騎蔡約翰隻「勁將軍」，以為後駒成就必定好過「爪皇凌雨」，結果「爪皇凌雨」益咗杜鵬志，自此亦成為杜鵬志揚威國際嘅棋子。
韋達嗰次無緣贏打吡，估唔到要五年後先至憑「極品絲綢」贏得呢項殊榮，馬主當然對佢有信心，呢啲就係人夾人緣。今次日賽，呢個馬主旗下隻「孟買之星」，來港第一戰已交俾韋達試馬，出戰泥地千二米，入口前喺澳洲八戰得兩冠，贏馬路程一三五○米及千四米全為草地，而八場賽事中，亦冇一場跑過泥地，顯然馬房只係想俾呢隻馬一場熱身，韋達仄完馬，往後兩仗交俾本地小將何澤堯策騎，所跑路程均屬短途，目的一樣用來提升隻馬戰鬥水準，直至最近一場，馬房終於安排番呢隻馬跑贏馬路程千四米，韋達終於攞番嚟騎，呢次大家可以睇下呢隻馬威力，以一三三磅排十三檔衝入一席第四，輸半個馬位俾頭馬「加州再豫」，其實距二及三名馬「勝利專家」同「白鷺飛翔」仲近，大家再細心睇睇，入到直路「孟買之星」其實跟「白鷺飛翔」一齊發力衝，兩隻馬後上勁度都強，不過「白鷺飛翔」負一一五磅，而「孟買之星」要負一三三磅，唔夠「白鷺飛翔」衝只得第四名可以原諒，今次對手雖然多，但本身狀態有增進，呢次大有本錢收復前失。