第七場、第三班、一六五○米。大馬主潘蘇通過往馬匹甚少跑谷草，多數揀沙田才上陣，印象中歷來只有「手風順」及「王者無敵」兩駒曾安排渡江上陣，但「大運起」今季起用祈普敦在同程開齋，馬主當日可能有其他嘢忙並冇到場拉頭馬，上次跑完沙田，今期告東尼又安排渡江重返勝途列陣，睇得出佢但求贏，咪睇匹馬贏完一路都三甲不入，其實一再執衰檔都輸得近，但近係冇用嘅，告仔為咗證明呢匹馬谷戰係好過沙田，點都要再下一城先至安樂，何況同主的廄侶「大雄圖」暫時並冇出路，咁搵「大運起」粗粗哋贏住先，都算啱數也。
第八場、第三班、一二○○米。今場馬膽看好文家良的「開心歡星」，名氣響亮兼且上季來港屢次近而未勝，來到今季雖然早在九月已開上戰陣，但廄主部署一點也不急，抖了兩個月在十一月尾方再出，然後又相隔一個月至十二月再出賽，馬匹狀態固然徐徐提升，但體力方面卻是非常充裕。「開心歡星」今季踏入四歲，來港前只跑了三場，加上在港九戰，肯定里程仍未盡；上仗用田泰安後上甚勁得第三只負半身位，已屆取勝邊沿，今次人馬再臨，排四檔料可異軍突起，取得在港首場勝仗。