楊明綸上周剃咗個陸軍裝頭，結果喺頒獎台上以新形象示人，替蘇偉賢大熱門「經典帝國」贏馬捧盃，不過，泥地馬喺香港發展空間唔大，倉主與幕後曾商量過點樣衝出香港，當然到杜拜跑係其中一個選擇，不過，另一個地方就係日本，因為五月份日本地方競馬會有場柏市紀念賽都可以受埋外地泥地馬玩，所以「經典帝國」都可以參與。睇番今次夜賽，楊明綸剛周日午間成為大忙人，不停穿梭高伯新、呂健威及姚本輝馬房睇馬，佢先到高伯新馬房睇隻「贏科超影」（圖前駒），由副練親自替呢隻馬踱步，踱後又教埋閘，倉主與楊明綸則喺欄邊睇到實一實，馬房手足指，呢隻馬神態生猛兼且馬身茁壯，比起上次贏馬時可以話有過之而無不及，「贏科超影」可以話係倉主今次夜賽最重視嘅一駒，近幾日下午，佢吩咐副練定要親自替匹馬於馬房內地堂踱步。
「贏科超影」上次於梁家俊胯下爆冷打開勝門，倉主賽後接受馬會官方電台訪問，佢誇讚係贏梁家俊韁繩工夫，因為全程隻馬好聽鞍上人控制，早段順跟馬群，轉正入直路才發揮一段特強爆炸力制敵，今次梁家俊正值停賽而轉用楊明綸，當然如果鞍上人能交回贏馬水準，下次策騎權或者保得往，相反一有閃失的話，梁家俊復出，策騎權必定要交番俾佢，所以楊明綸可以話不容有失。
神馬飛揚騎者重視
當楊明綸睇完「贏科超影」踱步及教閘後，未幾佢又入咗呂健威馬房睇「神馬飛揚」，呢隻馬又見馬房安排一位華籍助手替匹馬踱步，楊明綸在場觀察一輪，似乎對呢隻馬亦非常緊張，又問身旁工作人員，有關呢隻馬近期食料狀況，得悉一切正常才放心，呢隻「神馬飛揚」今次跑四班一哩，路程方面經已合腳法。呢隻上季來港自購馬，來港前兩戰兩捷，不過所贏路程屬二千米，經過適應期，最近一仗才落四班上陣，且所跑是千二米短途，擺明未有出擊誠意，楊明綸仄完呢課後，復課所有快工夫都由佢親自打磨，重視程度可想而知，今次跑谷草一哩，路程雖然仲未係最啱，但落到四班跑級數佔優，隨時可以爆個石破天驚。
欣喜欣喜盡快交代
之後楊明綸再入埋姚本輝馬房睇隻「欣喜欣喜」，馬房工作人員見楊明綸入倉，即問佢有冇興趣親自替「欣喜欣喜」踱步，楊明綸因為冇準備關係，於是交由其他馬房手足代勞，當「欣喜欣喜」加課踱步後，楊明綸又係問身旁馬房工作人員同一問題，問呢隻馬近期胃口如何，有冇食料報告可以睇，工作人員即取出呢隻馬嘅食料報告，甚至乎體溫報告亦取出來給楊明綸過目，正所謂知己知彼，了解自己坐騎進度再夾埋健康冇問題，陣上搏殺便能事半功倍。
講番呢隻「欣喜欣喜」，今季經已第三季在港上陣，僅得一次上名成績，乃谷草千二米獲第三名，但呢隻馬上季曾於谷草千八米跑過一席第四名，只輸頸位俾頭三名，所以幕後以為跑中距離偏長較合，不過始終唔能夠交出頭馬成績，所以今次不得不向現實低頭，再替呢隻馬出戰番曾經上過名嘅谷草千二米，希望能夠盡快作出交代。