第一匹在港上陣的「范高爾」子嗣「精明才子」出賽後，相信大家都對呢隻名氣馬子嗣有多少認識，雖然呢隻「精明才子」至今仲未贏過，但四出獲三亞一季，表現可以話非常準繩，單睇呢個數據，呢系子嗣在港上陣，大家可以放心一捧，因為很快能適應香港作賽環境。
今次又有一隻「范高爾」子嗣「興爾」上陣，隻馬同「精明才子」都係報咗名跑打吡，不過現時評八十六分插二班上陣，要取得入選資格，今場一出即勝仲趕到搭尾班車，今次跑第九場二班千八米，對苗禮德嚟講都係一個好大考驗，事關冇乜自購馬咁把炮，一出就將出擊目標放喺長途賽，換句說話，幕後都有多少信心及期望呢隻馬有好表現。「興爾」幕後用幾多錢買入就唔知，只知道週歲價係五十萬美金，都接近四百萬港幣，來港前喺法國跑過六場獲三冠兩亞一殿，三場贏馬路程分別係千六及千八米，嚟香港前最後一仗跑到二千米得第四名，所有上名成績，全由蘇兆輝策騎。呢隻係正宗長途馬，所以初出即報千八米，隻馬十一月先開始備戰，雖然操練時間唔多，但幕後都好積極同佢打磨，埋門彈過兩課大閘，狀態起得唔錯，呢次倉主好有心思，搵咗個跟「興爾」同聲同氣嘅騎師上陣，呢位就係法國籍嘅巴度，亦曾對呢隻馬有啲印象，所以交到佢手上可以收事半功倍效用。
「興爾」馬主，原來係澳門「興」系馬鄧興強公子所擁有，家族澳門先養馬，且養馬數量亦多，佢哋向來好喜歡贏大賽，好似早前於二○一六年，鄧興強就搵莫雷拉騎隻「興圖」捧走嗰屆澳門打吡大賽，香港呢個打吡大賽，同澳門呢個相比，當然級數高好多，佢哋家族齊齊揀到隻「興爾」來港上陣，目標都係呢個大賽，而兩父子對血統呢家嘢都有多少研究，信任佢哋眼光，應該唔會入錯貨。