「快樂實在」呢隻團體馬，成員包括馬德鐘同陳玉蓮，佢哋當然好希望愛駒能喺凱旋門威威，不過「快樂寶在」季初狀態一直麻麻，由於呢隻馬上季尾先至贏田草千六米，賽後升上三班，但當時評分加得唔多，所以馬房只要稍作安排，「快樂實在」好快便可落番四班上陣，所以季初幾仗，冇乜點催谷，在連輸幾仗後，今次終於獲降回四班上陣，馬房當然諗都唔諗，立刻同隻馬報番贏馬路程田草千六米。馬房本來想搵番上季贏過呢隻馬嘅騎師郭能跑，話晒郭能都曾經替呢隻馬打開勝門，知點樣跑最合尺寸，以佢係贏馬過來人自然最清楚，但郭能一早應承騎蘇保羅隻「奔馳寶馬」，冇得揀嘅情況下，唯有騎「奔馳寶馬」上陣。呢兩駒邊隻牌面最好，論級數當然係隻「快樂實在」高一籌。其實，「快樂實在」本身係隻慢熱中長途馬，上季尾贏完後，經過一個暑期，狀態冇特別作過保持，因此亦開始回落，練馬師睇準呢隻馬評分在降班邊緣，季初於是銳意替呢隻馬邊減分及熱身為目的，如果以近期水準而言，狀態經已遠勝上場，冇郭能壓陣唔緊要，馬房立刻搵來布達德客串，事關呢類要留後衝一段嘅馬，必需配合一流大師傳先至發揮得出威力，郭能屬英國騎師，跑尺寸馬到家至極，呢位布達德贏「育成天下」及「正本雄心」，顯出留放工架好，估計幕後一定做過功課至搵佢，再睇睇今場真正對手的確唔多，布達德難得有隻實力馬喺手，自然會砌到盡。