呢個世界有時真係好唔公平，反對派喺九龍西就Plan B、C、D爭餐懵，港島區就全面讓路畀「中箭（香港眾志）」周庭參選。近日傳出周庭有機會被DQ之後，佢就「欽點」咗民主黨前成員區諾軒做Plan B，似乎佢真係當咗個位係自己嘅財產，仲可以指明受益人𠻹，真係又一「民主」體現嘞。
「中箭」主席羅三七（羅冠聰）早前就因為瀆誓被裁定失去港島區的議席，所以今次補選已經一早表明會派人參加，傳過由羅三七（羅冠聰）女朋友、「中箭」副主席袁嘉蔚出戰，最終就派咗「極度徬徨及疲倦」嘅常委周庭。周庭甚至連「民主動力」嘅「初選」都唔使參加，真係「好大嘅官威」。
「威權」免初選 「友好」潛規則
佢嘅「威權」又點止咁簡單？當正個位係自己身家嘅周庭，因為擔心自己被DQ，已經搵埋Plan B，但就唔係一度有機會參選嘅袁嘉蔚，而係聲稱係「友好」嘅區諾軒，睇嚟內有乾坤。立法會補選係自由競爭嘅選舉，反對派唔單只搞「初選」玩篩選，仲玩埋欽點，真係要幾「民主」有幾「民主」。
其實，區諾軒嚿年9月退出民主黨嘅時候，已經有人批評佢左右逢源，趁補選去黐激進派攞着數，睇嚟成件事一早有預謀，難怪袁嘉蔚即使有男友做後台，都爭唔到出選的機會啦。
■香港文匯報記者 范童