■激進派cap埋圖問罪訟黨，不過人哋係「大佬」嘛，所以唔回應囉。 fb截圖反對派成日鬧人篩選、DQ，但其實做得最盡最絕就係佢哋自己。繼早前迫走Plan B民協老馮（馮檢基）之後，公民黨主席梁家傑（袋巾）噚日就喺facebook出文，話「姚松炎不是梁頌恆，周庭不是游蕙禎」，如果特區政府DQ姚、周兩人，就係違反《公民權利和政治權利國際公約》對每個人嘅保障喎。
「青症」的士梁（梁頌恆）見自己連做人嘅資格都畀梁家傑DQ埋，即刻截圖出文問佢︰「其實公民黨主席梁家傑係咪想指《公民權利和政治權利國際公約》係選擇性唔保障我的？」有網民就話，反對派呢啲行為咪叫「剝奪政治權利終身」囉。
選擇性玩條文 當「同道」唔係人
反對派有幾霸道，喺�哋自己倡議嘅「初選」機制已經睇得一清二楚，而為咗力保佢哋嘅心水，即係蟲炎（姚松炎）同「中箭（香港眾志）」周庭可以出選，就當「同道」唔係人。
梁家傑噚日喺fb出文，話蟲炎前年嘅宣誓詞「內容溫和」、周庭冇講過「港獨」，兩人唔係「雙邪」，如果DQ佢哋，就係「違反《公民權利和政治權利國際公約》保障人人無分種族、膚色、性別、語言、宗教、政見等可享不受無理限制的選舉權」，仲叫香港人「俾（畀）啲反應」。
的士梁一見到篇文就嬲嬲豬，截圖出文質問︰「其實公民黨主席梁家傑係咪想指《公民權利和政治權利國際公約》係選擇性唔保障我的？尊貴的梁主席又係咪代表公民黨？俗務煩（繁）重，假如其中任何一條問題的答案是『否』的話，煩請告之，唔好又屈我屈你。」Cheap禎（游蕙禎）就用歌詞留言問︰「如今這算什麼？」
唔少激進派即刻鬧爆傳統反對派。「Lai Chun Rex」留言話︰「你連做人嘅資格都俾人DQ埋喇。」
「Patpat Lau」講得再白啲︰「公民黨人一班律師決定把梁游刪除於人類行列，不受香港法例和國際人權保障。」「Ching Ching」就話︰「人家從來無當你係自己人。」
「KL Tam」質疑︰「佢係唔係自己友冇得選搞到語無倫次？」「Sidney Fong」揶揄︰「剝奪政治權利終身。」
「Man Hin Fung」也表示︰「除左（咗）令『泛民』滅黨，無第條路可以行，比（畀）啲反應，唔該。」
「Sunny Kan」亦鬧爆傳統反對派︰「個個都有資格，就係你班×樣冇資格話中共篩選候選人，褫奪不喜歡的候選人的參選資格。你問下你班人點樣對待馮檢基先啦。」
fb專頁「百彈齋主」就tag（標籤）晒梁家傑、公民黨黨魁戇橋（楊岳橋）同公民黨個專頁叫佢哋回應，但當然就係冇回應啦。
死忠搏命兜 揭訟黨挺DQ？
梁家傑支持者「Vincent Lai」就嘗試兜︰「傑哥的分析是指老共無理據以DQ梁、游的方式去處理周庭和姚松炎。」咁即係有理據DQ梁游啦？兜咗一大輪，公民黨咪又終於認同DQ「雙邪」，又係好合理嘅。
■香港文匯報記者 甘瑜