■姚松炎（左）入閘參選，搞到Plan C袁「又選又唔選」。資料圖片網民轟反對派操控選舉 恥笑民主黨醜到爆
「我彈出彈入，打我吖笨！」吳啟華喺《九品芝麻官》入面可能仲講得有啲招積，但民主黨Plan C 袁（袁海文）噚日就真係對呢句嘢整咗個好肉酸嘅演繹︰先係驚死舔唔切蟲炎（姚松炎）隨時入唔到閘嘅空缺，仆去報名參選九龍西；但冇耐蟲炎宣佈過到骨，令Plan C袁呢個參選美夢唔夠兩個鐘就「玩袁」。做得Plan C，可能佢都預咗嘅，但有網民就批評反對派操控選舉，應該搵老廉去查。亦有網民恥笑，民主黨作為香港反對陣營第一大黨，臨急臨忙參選然後匆匆退選，真係醜到爆，「姚松炎有得入閘就好開心，就階段性勝利？你仲以為呢班人最想爭取嘅，就係什麼『真普選』，或對當權者百倍奉還？咪天真啦！」 ■香港文匯報記者 陳庭佳
民主喎，自由意志喎，係反對派氹吓大家講嘅啫，都無講過佢哋會付諸實行。Plan C袁噚日下午兩點半去報名，搞完一輪手續都成三點幾，點知蟲炎一句話4點14分得悉有得入閘，就搞到佢要即刻搞返退選手續，前後唔夠兩粒鐘，「榮登」史上最短命參選人，仲要係斷鐘計嗰隻！
批「公就我贏 字就你輸」
網民「Yeung Kam Tim」鬧爆反對派今次堅係操控選舉，而成日話人操控嘅�哋，簡直係賊喊捉賊，「Edith Ho」就翻舊賬話反對派上次2016年立法會選舉玩「棄選」，今次仲玩退選，「香港的選舉畀（俾）『犯民』玩晒， 公就我贏，字就你輸！」「Kam Ng」直情叫「ICAC要查啦！」
亦都有花生友恥笑反對派爭啲連胎鈴都甩埋。「Kee Cyk」形容：「 一號唔得，二號你上！呀！一號迴光返照，有希望！二號，你退返落嚟......」「KC Kwok」就寸反對派醜態百出，「 呢頭參選， 嗰頭又退選，都好，搞到佢裙拉褲甩。」
激進派網民「史健仁」亦以「玩到你謝」喺facebook度出文，揶揄民主黨「堂堂香港反對陣營第一大黨要臨急臨忘（忙）推袁海文去報名，然後十幾廿分鐘後退選，臭（醜）到爆啦。」
「為咗食屎可以去到咁盡」
對於有人仲覺得今次姚松炎「戰勝威權」，佢就好似見到一大班網民俾人賣咗豬仔仲幫人數錢咁︰「姚松炎有得入閘就好開心，就階段性勝利？你仲以為呢班人最想爭取嘅，就係什麼『真普選』，或對當權者百倍奉還？咪天真啦，黃絲陣營為一個議席狗咬狗骨，打生打死，追求嘅嘢，其實只不過係渴望當權者放過自己一馬，放自己入閘，唔好斷自己財路。」
「益友」「陳永仁」就話，講到尾都係反對派場「初選」整死自己，愚不可及。「Ken LI」就寸反對派「為咗食屎可以去到咁盡，抵啲掌聲佢哋自己畀自己，我就畀笑聲笑×佢哋以示支持啦！」
話時話，Plan C 袁報過名，之後都要交選舉開支申報畀選舉事務處，大家睇實佢有無交呀！