「惑」系馬早兩個禮拜已贏夠一百場頭馬，許世勳是第一位在港贏足百場頭馬嘅馬主，由於馬主都有番咁上下年紀，近期都冇入場，所以頒獎儀式安排喺剛周日舉行，由馬會主席葉錫安親手將錦帶及紀念綵衣贈送俾馬主留念。如果講有機會破許世勳呢個紀錄，現時當馬主應該比佢以前容易做到，事關以前一位馬主只能養三隻馬，現在可以養四隻，加上以前跑馬賽期唔係好似宜家咁逢三、六或日，所以要效法馬主許咁，應該後繼有人，目前兩大馬主郭少明及蕭百君，呢兩位仁兄養馬數目真係多到不得了，郭少明至今以個人名義擁有十八隻馬，另外兩隻同佢老婆聯名，即係有二十隻咁多，當然佢仲有啲團體馬及子女所養嘅馬未計在內，只計佢兩公婆名義嘅二十匹戰馬，目前贏咗三十六場頭馬，至於蕭百君，家族養馬當然又係嚇死人，如果單計佢名義，到現時為止共養咗十六隻，取得頭馬共三十五場，比郭少明少一場，呢兩位大馬主，若繼續保持咁熱衷賽馬運動嘅誠意，實有機會與「惑」系馬看齊。今次夜賽，咁橋呢兩位馬主都有馬列陣，仲係同一場較技，分別係蕭百君隻「達羅素」及郭少明隻「美麗鉅星」，呢兩隻馬喺第五場跑二班一哩，兩隻馬近期表現都唔錯，「達羅素」今季跑六仗五上名，至於「美麗鉅星」最近四戰三度入三甲，狀態都有唔錯水準，兩駒幕後鬥志如虹，大家都係好想贏馬，呢條連贏及位置Q不妨投佢哋一票，話晒都係實力馬。