「積多福」早前宣布退役，呢隻馬最威水當然係贏咗韓國短途錦標，雖然服役時候頭馬數字唔多，退役時連埋贏外地僅得四W，但由於演出準，經常跑三甲，所以馬迷都唔會陌生，由於近年受腳患纏身，加上早年患有乾皮症，馬主愛錫良駒，決定將呢隻馬運去加拿大牧場頤養天年，呢個對一隻戰馬嚟講，可以話係最好嘅下場。而馬主立刻同隻馬整咗個面書，等大家可以經常入去關心一下隻馬近況，另外，其他「福」系馬動態亦會加入其中，對呢系馬有情意結馬迷，得閒不妨入去睇睇個「福」系面書。「福」系馬養遍港澳，今次夜賽又有兩隻「福」系馬列陣，一隻「招多福」，另一隻係「家多福」，「家多福」季初狀態比較反覆，即使今次跑贏馬路程，機會都係唔睇好，反而上次國際騎師錦標賽由杜滿萊披甲跑拿手一哩嘅「招多福」，呢次交俾貝湯美出戰就值得留意。「招多福」今季跑咗四次，呢四次都係跑谷草一哩，季初一出，正如去季一樣頭威頭勢，先由田泰安贏馬，再出因為騎者攞大外檔衝，影相輸少少俾「勢必跑」，自此之後，「招多福」再出趁田泰安停賽，索性換上羅理雅試一試，呢一次雖然冇攞蝕位，但失驚無神遇文家良隻「有獎」突發難，結果又力拚下僅得亞軍。由於一連打過幾次硬仗，「招多福」國騎騎師錦標賽抽配杜滿萊，但陣上發揮唔出預期水準，落敗純粹因為體力鍊到呢個時候都差唔少，幕後當然好希望頂多一鋪，可惜如意算盤打唔響。「招多福」自上場十二月六日到現今經已有個半月冇上陣，不過休息期間，依然有正常備戰，彈過兩課大閘，一課谷草千二米得第四名，另一課泥地千二米得第五名，兩課大閘走來都非常墜手，顯示有番贏馬啖火，呢次用貝湯美，相信是騎練繼「星洲司令」後另一傑作。