上個禮拜紐西蘭有個卡拉卡周歲馬拍賣會舉行，香港練馬師有何良及姚本輝入到貨，何良喺拍賣會第二日先至入咗三隻，至於姚本輝第一日即入咗隻，以四十二萬紐元投得，買完之後，周五即搭機返港，原來佢安排咗周六晚請班馬房手足食團年飯。班手足指出，姚本輝到紐西蘭買馬，行色匆匆，原因係掛住餐團年飯，其二就係未來日子係呢個馬房大搏殺時候。呢次夜賽此廄四匹正選馬，隻隻有實力，用王牌報名嗰兩隻「包裝騎士」及「春盈」，後者已打疊贏兩場，呢次上三班有輕磅之利可一股作氣謀三捷。至於隻「包裝騎士」已回夠氣，隨時還我本來。
除呢兩隻馬阿頭緊張外，仲有隻第五班跑一哩嘅「威震天」，評分可以話減到過晒龍，隨時可以重振雄風，大家不妨睇睇呢隻馬季初評四十四分嘅時候，曾經喺場四班一哩跑三名，頭二馬分別係「事必獲利」及「教主」，佢輸唔夠個半身位，以咁嘅實力，落到五班跑一哩點都有權贏。再睇上季贏四班一哩，第二名係「君悅灣」，第三名係「聚歡笑」，揸住呢兩場一哩賽績，五班跑好少少，足有橫行本錢。今次負一三三磅跑，唔少人都會擔心，但倉主未去紐西蘭前經已搵定工作人員向賀賢借潘明輝，此君近期替沈集成爆完隻「飛越峰」，信心返晒嚟，呢隻「威震天」利用佢減七磅，實際只以一二六磅列陣，勝算自然有番咁上下。為咗呢次不容有失，倉主吩咐副練，潘明輝一幫師父賀賢做完工夫，便要入倉幫手替呢隻「威震天」喺馬房地堂踱步，近期潘明輝都聽教聽話，一操好師父倉嘅馬，二話不說便入姚廄幫手，講真只要姚本輝睇得起佢，日後仲會陸續有關照，呢隻「威震天」只是考牌馬，潘明輝搶閘工夫算唔錯，加上呢隻馬近況又弗番，屆時必可替馬房添勝仗。