上個禮拜日容天鵬馬房想搏大霧，兩隻冷門馬「嘉應風采」及「都市神話」殺入圍，令到兩條連贏位過千元，呢個倉今季有鎮倉寶「平湖之星」，幕後喺一月中搞咗個慶功宴，但呢個周二又準備咗自助餐晚宴慶功，上次喺尖東酒店搞，呢次就喺香港金鐘一間五星級酒店招呼馬房上下手足，今季馬房慶功宴浪接浪，相信呢隻「平湖之星」慶功宴，稍後時間仲會陸續有來。今次夜賽呢個馬房隻「幸運興隆」經已摩拳擦掌，上兩次跑谷草千二米欠缺運氣屈居亞軍，一次輸俾「育成寶貝」，僅終點一步影輸；最近一場排十一檔，騎開呢隻馬嘅李寶利推庄唔騎，交俾史卓豐披甲，事關李寶利要騎另一隻實力馬「陀飛輪」，後者新降班，結果真係「陀飛輪」贏咗「幸運興隆」。雖然上次李寶利唔騎「幸運興隆」而取「陀飛輪」，但幕後冇怪佢，今次馬房安排隻馬再跑谷草千二米，一早搵番李寶利披甲，至於狀態呢一層，今季呢隻馬大熟大勇，雖然升番上三班跑，即使未再贏馬，亦有三次拚入亞軍成績，由於今季隻馬逢出必拚關係，所以近期操練都冇乜快跳工夫，多數喺內圈踱步儲火保留體力，當然，齋踱步未必夠運動量，其實，近期每日下午，呢隻馬都經常喺地堂加課，有時出機坪踱，每日均做兩輪踱步工夫，狀態與季內上名或取勝係一模一樣，今次只要有多少運氣，相信以目前水準，有本錢贏得季內第二場勝利，馬房又有機會憑此駒增添頭馬成績。