方嘉柏近期運氣麻麻，已接近兩個多月冇贏過馬，上周三夜賽，旗下「喜進」跑得亞軍未能打破悶局，今次馬房安排八駒上陣，其中出戰第四場四班一千米嘅「聰明申報」有機會幫馬房重啟勝門。「聰明申報」來港後一直在霍利時馬房豢養，前後跑過三季，首兩季合共交出四場頭馬，上季先至無頭馬進帳，於是今季轉入方嘉柏馬房。其實，轉馬房的原因，並非因上季無頭馬贏便轉倉，只是呢匹團體馬，當中有團體成員轉變，轉變之後，成員想他投謀突破，最後搵到方嘉柏馬房收容，今季一出便在方廄上陣，結果首戰跑谷草一千米，即有上名成績交出，當時是三班戰，頭二馬分別是「積極皇」同「運財童子」，一般人認為有了這場第三名嘅成績，馬匹往後好快便有頭馬見面。但事實啱啱相反，「聰明申報」在三班往後上陣卻只是積極安排減分，直到近期獲調減至六十分，剛好獲降落四班資格，馬房才開始真正磨練牠，咪睇正常晨操只是安排踱步打磨，其實，近期每日下午均見馬房安排牠往機坪踱步或是馬房內作走花蹄活動，有時更拉去游水，講備戰緊張程度，現時是最積極嘅時候，當然，馬房冇明刀明槍打磨，多少都是希望呢隻馬贏嘅時候有分頭，大家可以睇睇呢隻馬跑四班賽往績，過往只係跑過兩次，一次谷草千二米得第三名，另一次屬谷草一千米取得勝利，四班賽對隻馬來講，形勢非常有利，今次難得機會重落四班列陣，大家不妨睇高一線。