賀賢由雞年贏到狗年，總算紓緩一下壓力。其實，對賀賢嚟講，好事點止一不離二，值情係二不離三，因為佢太太初三入場向在場記者宣報有喜，且經已有五個月，預產期係七月份，雖然七月中剛剛係暑假開始，但賀賢兩公婆會留喺香港，呢份禮物相信賀賢最喜歡收到。喜訊公開之後，各方朋友都向佢哋恭賀，而呢個旺氣持續下，料會接二連三有馬贏，好似今次「先生」系馬，派出「真先生」（圖1號）出戰谷草千二米，繼「亮先生」一出即勝後，「真先生」幕後又想乘勝追擊，其實，「真先生」上次由潘明輝跑千四米經已心存大慾，可惜遇上蔡約翰匹「平海福星」發揮出強橫後勁，終點前擒下「真先生」才令爆冷夢成空。其實，今季「真先生」長期有勇態支持，季內四場亞軍都係僅輸俾對手，最近一仗便是以頭位影輸俾「平海福星」，另外三場谷草千二米，一場以頭位影輸俾「駿明珍寶」，一場就以頸位鬥輸俾「川河尊駒」，仲有一場就係以頸位拚輸俾「華美之友」，大家睇睇呢四場阿二，能贏佢嘅對手，季內都贏超過兩場或以上頭馬，所以證明隻馬未贏係欠運。今次出戰谷草千二米，呢個路程係佢最佳出路，合共有三冠六亞兩季兩殿成績，僅一次得第九名，基本上每次上陣，佢必會跑得近。自上仗田草千四米跑得亞軍後，復課絕少有快跳工夫打磨，多數以踱步為主，畢竟季內經已跑過唔少場，本身勇態早已具備，只係等候一個合適機會。而呢隻馬真係好擅長跑谷草千二米，因為無論排乜檔，只要有勇態支持，往往會交出應有威力，所以今次抽個五檔上陣，基本上對隻馬爭勝冇乜大影響，相信呢系人馬繼上周日贏完隻「亮先生」後，今周三呢個年初六賽事，大可再憑「真先生」再入凱旋門，可以喺狗年贏完一場又一場。