區諾軒被陳家珮踢爆曾經公開焚燒基本法，被批評並不符合真心擁護基本法的參選條件，區諾軒驚被DQ，在fb連發兩個posts（圖）狡辯話自己當時「只是焚燒基本法附件三的道具」，而焚燒道具「是遊行示威的常用手法」，仲反咬一口話對方「抹黑」佢。有網民就揶揄佢：「有證有據都叫抹黑，呢啲咪叫語言偽術。」
在前晚舉行的電視論壇中，陳家珮展示一幅拍攝到區諾軒焚燒基本法的照片。區諾軒最先聲大夾惡地否認，在證據確鑿下才死死氣承認；陳家珮當時指出，該幅照片是2016年11月「反釋法」行動所攝，區諾軒在回應時就話該幅照片是抗議全國人大常委會的「8．31」決定集會中所攝，被批評謊話連篇。
區諾軒其後在fb發帖，狡辯話自己最初否認，係「由於當時我與陳家珮相距甚遠，加上該相片只有我的背影，我實在無法清楚認出圖片當中的具體場景」喎。
他承認自己在2016年11月的「反釋法」遊行中焚燒基本法。不過，雖然照片清楚看到被焚燒的基本法的封面，佢就擘大眼講大話，話自己只係燒基本法嘅「附件三」，又試圖混淆視聽，將基本法同商業機構嘅單張相提並論：「焚燒文件、信件或者其他道具，是遊行示威的常用手法......我也曾焚燒過印有領展外判公司名稱的信紙，抗議領展變賣資產。」
迴避燒基本法 「眾志」同死撐
佢昨日又出第二個帖，繼續迴避焚燒基本法一事，只係話自己「無懼抹黑，堅持信念」咁話：「我毋須像某些候選人一般『洗底』，也不懼怕這些抹黑......陳家珮繼續炒作DQ，暴露了她贊成政府政治篩選候選人的真面目」云云。
一直在區諾軒背後「發功」，延續其政治利益的「香港眾志」，幾個頭頭就發帖死撐對方。不過，佢哋都刻意迴避事實，就係區諾軒的確焚燒過基本法，亦迴避問題核心，就係焚燒基本法者點樣可以擁護基本法？所以，佢哋只係顧左右而言他。
好似「眾志」主席羅冠聰就聲稱，「陳家珮當然希望區軒被DQ，否則以佢嘅質素，除非係無競爭對手，否則都幾難入立法會......講到尾，都係驚輸，咁驚輸就番（返）屋企啦。」
秘書長黃之鋒則稱：「咁鐘（鍾）意DQ就唔好參選立法會，直接考入政府度做政務官，咪可以做選舉主任DQ人。」
佢哋粉絲亦都迴避關鍵問題，更明明事實俱在都話係對手抹黑，仲叫人要「理性辯論政綱」喎！喂，阿哥，陳家珮用英文答記者問題，一時緊張口窒你哋就玩足成個禮拜，幾時有提過要辯論過政綱呀，現在衰咗就改口啦？
網友斥身有屎 影衰港人
不過，喺成班盲粉圍爐之時，清醒嘅人都係有嘅。「Bert S F Wong」就狠批區諾軒：「有證有據都叫抹黑，呢啲咪叫語言偽術。你條友唔係身有屎，使鬼解釋咁多野（嘢）咩！你真係影衰香港人！」
「Benny Tsang」就一語道破：「你『淆底』驚被DQ。但都可以理解嘅，輕輕鬆鬆咁逗九萬幾蚊月薪，又真係好吸引。」■香港文匯報記者 羅旦