三月廿八日就係杜拜世界盃盛事，香港有唔少馬都報咗名，呢一批馬大部分安排喺今周日跑香港金盃或女皇銀禧紀念賽。可以視作為前哨戰，若能攞埋個盃先至遠征杜拜，氣勢都唔同啲。女皇銀禧盃呢場，「爭分奪秒」、「壯思飛」、「喜蓮獎星」及「美麗傳承」都會出戰杜拜。另外香港金盃個場，「馬克羅斯」及「明月千里」亦會到杜拜出戰，大家都好想贏到呢場一級賽以壯行色。香港金盃個場，大摩派出「明月千里」、「喜蓮彩星」及「鷹雄」，主力當然放喺由布文執韁嘅「明月千里」身上，當然大家都會聚焦喺「馬克羅斯」身上，不過呢隻馬部署唔見好似跑香港盃咁谷到行晒，隻馬贏香港盃前，先喺婦女銀袋賽用喪放戰術，放到拉士一步輸頭位俾「創世紀」，再出增程跑二千米馬會盃就輸俾「明月千里」，當然，最終呢隻馬都可以喺香港盃贏番場，不過上次跑董事盃，狀態肯定未復最佳水準。假如告東尼將目標放喺杜拜大賽，估計呢場金盃只係順勢發揮，去到三月底狀態才真正到位。相反「明月千里」就唔同，大摩與幕後知道隻馬有幾多料，以宜家能力未必可以同「馬克羅斯」呢隻後生仔鬥，不過咁，假如睇準一次半次機會，本土賽硬拚偷吓雞，亦未必無本錢贏馬，好似呢次跑香港金盃咁，狀態經已操到火紅火綠，幕後不惜用十幾二十萬再請布文嚟，一定會搏老命，所以今次香港金盃捧邊隻，有賠率兼好鬥志，「明月千里」是首選材。