呂健威馬房呢排真係旺，頻頻有馬贏，年初三贏完「開心美麗」後，年初六夜馬又贏「軍歌」，當晚只出兩隻馬，除「軍歌」贏馬外，「勁有波幅」跑得亞軍。講真，今季呂健威成績唔錯，跑咗半季多啲，經已有二十六場頭馬成績，上季曾經有一輪成績麻麻哋，據講佢用開個打料師，因為退休關係，新接手呢位仁兄一下子未能掌握番以前個位打料老師傅技術，所以成績接唔上，及後練馬師搵多個馬房經驗領班幫手，結果成績逐漸納回正軌，今季一開波呢個馬房頭頭是道，全因有呢位經驗領班幫呂健威睇住個馬房。
今次日賽，呂廄大軍壓境，部署六隻戰馬上陣，其中第三場隻「人間尋夢」（圖前駒），呢次轉戰田草二千米，睇上場呢隻馬開齋姿態，相信五班難留，當然，上次呢隻馬所贏屬谷草千八米，呢次轉跑田草二千米，馬房有信心作此部署，大家不妨繼續吼實呢隻馬。其實，「人間尋夢」因為血統關係，初期俾人印象係隻短途馬，不過，當跑過一次一千米直路賽上名之後，再出場場無影，主要跟馬匹進度未足有關，由於隻馬仲係年青關係，幕後決定順其自然等隻馬發展，上季尾馬匹更降到五班上陣，今季一出即喺田草千六米衝得近，然後喺場谷草千八米打開勝門。馬房喺「人間尋夢」成長期間，細心查過呢隻馬母系血統雖然戰績一般，不過都係偏中長途較合腳法，所以「人間尋夢」即使父線屬短途馬，但遺傳得唔多，喺遲熟馬性下，性能變成長優於短。今次馬房安排呢隻馬出戰二千米，經已有晒信心可以應付，鞍上人亦一早搵定梁家俊再替呢隻馬多斬四両，如果上次走咗寶冇捧呢隻馬場嘅馬友，今次不妨跟番一注，目前五班有多少着數，可以從低位反彈，返回四班一樣有本錢贏馬。