踏入狗年，方嘉柏終喺年初六夜賽贏隻「聰明申報」，諗住從此旺番，不過上周日賽事，依然冇頭馬進帳，隻「跳出香港」想搏命，但俾雷神隻「東方快車」影贏，其實方仔都算叻，呢隻「跳出香港」一早搵定雷神過檔，但最終雷神揀番替蔡廄「東方快車」披甲，話晒榮大董嘅馬，點都要俾面，果然就係咁樣俾「東方快車」贏咗「跳出香港」，咁當然如後者進度更理想嘅話，亦都可能吸引雷神披甲，睇嚟下次呢隻「跳出香港」鞍上人，冇乜意外應該落番莫雷拉手。
今次夜賽，又有一隻新轉倉馬等住方嘉柏交代，呢隻就係跑第一場隻「永常喜」（圖前駒），上手練馬師李易達訓練呢隻馬經已三季，季初仍喺呢個馬房養練時，亦曾經交出過兩亞一季成績，但始終未能再贏，而往績所示，「永常喜」上季喺田草一千米直路賽建功，該場屬四班賽，第二名及第三名馬分別是「超越時空」同「飛躍成功」，兩隻馬雖然經已退役，但短途實力唔錯，後者更是一千米直路專家，不過，李易達就越練越沉，一直都未能帶領呢隻馬贏第二場頭馬。
上場「永常喜」是由李易達馬房轉投方廄的首戰，被安排跑谷草一千米，該場更強配雷神出戰，所以臨場被捧成三倍半大熱門馬，不過呢仗「永常喜」見唔到隻馬一貫噴射速度，起步只居馬林搶唔出，最終只得一席第五名而回，輸兩個半身位俾頭馬「要風得鋒」，跑埋呢仗谷草短途，一向擅部署谷戰嘅方嘉柏都認定呢隻馬跑窄場性能麻麻，於是急急轉番沙田賽程。而睇過今季「永常喜」喺李易達馬房三場上名成績，其中一場屬有根據一千米直路賽之外，其餘兩場便是泥地千二米，於是決心安排呢隻馬出戰泥地千二米兼轉用潘頓跑，配搭方面未有減弱，睇嚟方握S可憑呢隻轉倉馬省靚招牌。