第三場「巴基小子」講真質素三班不足四班有凸，上月中落班存心搏殺卻遇上伏兵「大收成」得第二，升班輸兩場又返落嚟，難得評磅員放佢一馬，今再等泥地而來，雷神再騎必打硬仗。「智愛」季內兩勝包括田草千二及千四米，夜泥同程亦曾上名，今次舊地重遊有力作出威脅。
第四場「架勢」上次新降五班，即於谷中千八米後上跑第二，頭馬「友歡笑」已經七歲，看似平凡，但兩駒有廿六磅之差，一匹順放一匹力追，表現其實已不錯，而且「架勢」只是初起，今重返四班，大幅減磅出戰長直路更好跑。「金獅雷將」拍賣馬兩勝泥地一哩正值當打當紮，千八米此程一定不嫌長，克服到讓磅仍有機會爭取三連勝。
第五場「勝利專家」來港前後進步不大，今季初於四班兩度搏殺失手，升上三班五個月跑過九場，只一次亞軍兩次第三，其餘都輸得不遠，準繩有餘威力不足，今回降四班換一批較弱對手可望提升戰鬥力。「旋風腿」本身肯定長優於短，贏完繼續跑千二米欠進是正常，落腳變慢加程上陣料有利無壞。
第六場只有「翡翠福星」、「慣勝共贏」及「金剛之星」季內贏過此班，都值得秤先，「翡翠福星」所贏「冰糖葫蘆」再出差些少補中，賽績方面比較實在，「慣勝共贏」細馬小休個半月，同父「開心美麗」及「金剛之星」都贏此程，在此是奇兵一路。
第七場「激賞」傳聞身價高達八百五十萬，澳洲兩戰兩勝賽績亮麗，來港已六次試大閘，最近泥閘更輕鬆勝出，做足工夫上陣可望打響頭炮。「添好運」五戰泥地三冠一亞一季全上名，路程專家難得同場對手無多，可期重叩勝門。
第八場「上簽」與「豹子頭」在此可以講係一時瑜亮，兩匹三歲馬都係季內三戰泥地千二米全勝，惟前駒用手風大順的潘頓兼曾跑多一場草地及有夜間作戰經驗，機會稍稍睇高一線。