今屆香港金盃名花有主，告東尼馬房「馬克羅斯」以一放到底姿態取勝，雖然直路曾一度受前馬王「明月千里」步步進逼，但始終可以頂埋最後幾步，仲破二千米紀錄時間，呢匹新鮮出爐香港盃盟主，確是實至名歸，幕後經已決定下仗會跑女皇盃。呢一場除告東尼隻「馬克羅斯」演出受人讚賞外，最值得一提係隻性格巨星「巴基之星」，隻馬配上蔡明紹跑得頭頭是道，證明已重拾角逐興趣，未來馬房替隻馬重新部署，有機會跟「馬克羅斯」組成雙箭頭爭各項大賽，屆時可能潘頓同雷神均有機會替呢對實力馬效力。講開雷神，香港金盃推咗唔騎「巴基之星」，不過，佢就答應騎番呢個馬主隻「巴基小子」出戰今次夜馬泥地賽，大家都知道「巴基小子」並唔係隻質素高嘅馬，今季跑到第四季，季內亦跑過九仗，只交出一亞一季成績，得第二呢場跑泥地千二米影相輸俾「大收成」短馬頭，可以話唔多夠運。另一仗上名，則由雷神跑三班得季軍，輸俾頭二馬「老友記」及「龍城猛將」就略遠，接近三個馬位。當然雷神肯接「巴基小子」上陣係有佢原因，呢隻七歲馬實力雖見底，但跑四班賽依然具有一定威力，上季就係贏過一場四班賽，亦係去季唯一嘅頭馬，鞍上人就係雷神，贏谷草千二米，該場蹄下敗將係「越跑越好」及「金磚五國」，所以大家可以睇到呢隻馬目前實力要遇到乜嘢對手先至有得贏。呢次重新降回四班上陣，用到雷神又係幕後決心出擊嘅時候。