踏入狗年雷神所贏頭馬數字與潘頓相比，可以話較為遜色，不過呢個周末蔡約翰出成手惡馬，如「平海福星」及「精算風暴」等，加埋蘇偉賢隻「八十八十」都係實力馬，上述三隻超級馬，以雷神嘅奶牷A如果唔能夠全部順利勝出，可能雷神躉都會失望。當然，運氣好少少，其餘邊線坐騎贏多一兩匹都唔出奇，潘頓今個禮拜頂唔頂得住雷神攻勢，真係要跑過至知。
有個參考性數據，大家不妨攞嚟參考一下，就係雷神踏入二○一八年，所勝出二十五場頭馬之中，竟然有十八場出自蔡約翰馬房，最近一仗頭馬就係蔡廄嘅「架勢」，由此可見要追捧雷神嘅坐騎，最可靠都係搵雷神夾蔡約翰嘅馬。「平海福星」及「精算風暴」（圖右前藍帽）最有冠軍相，前者可能有機會遇伏兵，但「精算風暴」上場跑千二米，大家睇睇隻馬點樣連位置都冇，今次增程跑千四米料可以收復前失。「精算」系馬一直十分支持蔡約翰，當然蔡約翰亦落足心機同呢系馬安排出擊，上周日由羅理雅騎隻「精算閃擊」，呢隻馬與「精算風暴」同主，前者莫雷拉騎過，但再出因為同場佢揀咗「不可說」跑，結果「精算閃擊」跟「不可說」串Q而回，顯見倉主對呢系馬非常用心部署。至於呢隻「精算風暴」初出一戰跑千二米，早段俾馬群放到甩轆，末段搵位又論盡，結果姍姍來遲得一席第四名，只輸一條頸位俾頭馬「鑽得勁」，而所輸呢條頸位，假如終點可移後一步，頭馬經已屬「精算風暴」，不過，事件已成事實，再多啲如果也難改變賽果，倉主與雷神睇到「精算風暴」現時嘅性能，不會是隻快開馬，加上要跑順一程才能展開一段強勁衝刺，於是今次安排隻馬增程跑千四米，目標好清晰，只係希望替呢隻馬可以順利補中。