梁家俊杜拜騎「經典帝國」墮馬無功而還，返港後跑兩次賽事仍未有頭馬進帳，實力馬如「環翠戰士」及「金地飛客」表現未如預期，希望呢位華將一哥短期內可以回復信心。今次羅富全嘅「都靈紅星」依然搵梁家俊披甲，上場隻馬輸俾「常拼常勝」，兩駒相差八磅，影相輸個頭只係欠運。今次再跑千四米，路程有過上名根據，再睇備戰過程，上個禮拜五可能梁家俊經已飛咗過杜拜，所以馬房安排「都靈紅星」彈課千二米泥閘用楊明綸代勞，狀態一向有番咁上下嘅「都靈紅星」，倉主可能柯打鞍上人呢課閘盡情發揮，因為點計今場都會係熱門，收埋嚟操與明正言順操，賠率都唔會差好遠，所以楊明綸試呢課大閘實牙實齒，走位5 3 1，以四份三馬位輕取報名跑今屆打吡嘅「福將」。假如以呢課大閘嚟睇，「都靈紅星」狀態係有升無跌，梁家俊呢次再獲幕後重用必定會珍惜機會，因為，現時華將面對最大威脅，就係潘頓及雷神兩位頂級騎師，只要他們向幕後開口索騎，大部分馬主也願意將愛駒交俾佢哋操刀，正如「好彩波幅」，今季由梁家俊開齋，再出未能順利連捷，只跑得第三名就冇得再騎番，而呢隻馬今周末再度出戰，經已被潘頓奪去策騎權，潘頓始終受幕後信任，同主「勁有波幅」前仗由潘頓贏馬，但之前熱門搏失，卻依然有機會補中，相反，梁家俊就冇咁幸運，所以今次「都靈紅星」在梁家俊心目中是匹許勝不許敗嘅馬。