■謝霆鋒代表華人首位出戰外國名廚David Rocco，比拚廚藝。香港文匯報訊 （記者 植毅儀）福斯傳媒集團全新原創節目《名廚爭鋒》即將面世，並特別請到亞洲巨星名廚謝霆鋒與加拿大帥廚大衛洛可David Rocco橫跨亞洲五大城市進行廚藝對決，節目將在3月25日起，每周日在Fox Life及Fox+播出。人在廈門的謝霆鋒接受電話訪問表示代表華人首位出戰外國名廚，壓力好大，也因為對住David Rocco，佢係一個都好有名的名廚，而且要蒙上眼睛品嚐當地著名美食，再去複製及演繹自己的版本，所以難度提升了很多。霆鋒表示甚至有人覺得自己攞自己去賭，咁輸咗呢？霆鋒坦言有信心先去，今次希望畀世界各地的人睇到，中菜都可以係健康同時尚，如果大家想維護中菜，慢慢要向世界行出多一步。
一連五集的《名廚爭鋒》，兩大星級廚師將會帶大家走訪亞洲五個城市，包括澳門、順德、馬尼拉、怡保及吉隆坡，當地名廚除了會親自選擇地道菜式給謝霆鋒與大衛．洛可較量，展開一連串的中西廚藝對決之外，還會介紹各地的飲食文化。
對手經驗豐富造成壓力大
拍攝過程，兩位主廚抵達當地城市之後，將會被蒙上眼睛品嚐當地名廚的拿手名菜，然後必須試着到市場尋找正確的食材重現或創意再現這道名菜。謝霆鋒代表東方亞洲料理巨星主廚，在節目中和他對抗競賽的是代表西方料理巨星主廚David Rocco，他擁有成功的美食節目，透過熒幕傳達對料理的熱情給上百萬個家庭，並且還著有暢銷料理書，結合食物、旅行和生活元素，分享給所有喜愛的朋友。霆鋒接受電話訪問說：「能夠代表華人出戰，壓力好大。因為David係好有名的名廚，我們要蒙眼去試當地美食，再複製同演繹自己版本，難度提升好多。」霆鋒讚David份人好隨和，大家都喺加拿大住過，某程度上想法同態度相似他說：「之前睇過佢節目，做得好好，好有人情味，佢捉每一個地方或國家料理神髓幾準，我都佩服佢呢個精神。佢的優勝之處係比我煮得耐好多，佢由細跟阿嫲入廚房，佢經驗比我豐富。」
講到有冇鑽研新招應戰，霆鋒表示去每一個地方之前，都有search當地最出名食材同菜式，始終係比賽，要有少少準備。問及私底下有冇搵人切磋？霆鋒坦言沒有，又花時間又花心機。之前霆鋒煮嘢被網民cap圖喺網上熱論，問到會唔會介意被網民惡搞形象？佢表示冇所謂：「尤其呢個唔係我的節目，規則唔係我的，剪接又唔係我，不過呢啲話題令我覺得自己節目可以再好啲。」平時有冇為家人下廚？霆鋒話：「每次返來都一定會煮嘢畀屋企人食，他們鍾意邊度菜？因為我成日都變，基本上每次都試唔同嘢，你可以問番他們。」
向世界展示健康時尚中菜
最後總結呢個節目，霆鋒表示好多人都問：「嘩！你玩咁大，今日《鋒味》喺成個中國都算係首席的美食IP，你攞自己去賭呀？咁輸咗呢？」霆鋒表示當然自己覺得有得打，有信心先去。霆鋒說：「唱歌聽得到，拍戲睇得到，煮嘢大家食唔到。好希望透過唔係自己的節目，係一個國際性的美國電視台節目，按他們定的規矩，十幾廿個專業評委係他們搵，限制係嚴格，在咁公正節目中去行呢步（比賽），我係願意去到咁盡，去賭博一次。同時老土啲講番，好多西方廚、西方人口中一提到中菜又重味又重油，我今次用的方式、方向，是希望畀世界各地的人睇到，中菜都可以係健康同時尚，如果大家想維護中餐，慢慢要向世界行出多一步。」他節目中一道菜是用鯪魚起肉，再將鯪魚皮包住魚肉加紫菜，用炒鮮奶做襯底。賽果會在節目上揭曉。