反對派經常稱話支持建多啲屋，解決市民居住問題，但其實仲有一句潛台詞冇講，就係「not in my backyard」囉！蟲炎（姚松炎）異想天開，話要將鰂魚涌嘅休憩公園興建合作社房屋，但佢就反對喺置富旁興建公屋，原來因為佢「家住置富」，所以搞人唔搞自己，最後就辣着埋港島東區其他反對派嘅區議員。
蟲炎提出要喺在鰂魚涌公園較「偏遠」的位置建屋，又建議在東區走廊經往太古海濱一段的馬路上蓋位置興建露天平台等等，自然俾人鬧爆。身為太古城西區議員嘅趙家賢，已即時發聲明話社區規劃的更新，社區持份者的參與非常重要，尤其對於一直「倡議民主」參與社區規劃的政治人物，更應先諮詢後規劃，確保居民的意見被尊重。
佢仲話，蟲炎提出有關建議時，兩名太古城民選議員，即係佢同太古城東嘅王振星，及區內重要持份者的業主代表從未曾獲邀作任何聚焦小組等形式的社區參與及意見交流。如任何「民主派」朋友對太古城區有任何重大建議，實應有商有量，保持「民主派」應有的合作及協調。
身為工程師嘅王振星亦發聲明，話計劃中的各項措施實在是「天馬行空」，城市規劃除創新之外更重要的是與現有社區融合。蟲炎提出各項建議前並沒有諮詢居民、業主代表和兩名太古城區議員的意見。
反指人小圈子 姚話慣咗係咁
不過，蟲炎就寸嘴反擊，話自己咁樣公佈自己嘅建議，正係希望透過「由下而上」收集民間意見，而非「先透過小圈子或代議士去了解」，更直指呢個係佢嘅「常用手法」喎。
話要喺太古城建屋就鬼咁口響，但一講到要喺佢屋企置富附近起屋安置受華富邨重建影響居民，佢就即刻動員反對。由佢支持嘅「置富花園居民協會」及「南區綠化地改劃關注組」，就向城規會提出申請，將置富山谷一幅約3.4公頃的住宅用地，改劃為生態古蹟公園，城規會今日會審議有關申請。
鴿黨區員辣着 鬧爆蟲炎離地
民主黨南區區議員柴文瀚就發以「華富唔得 太古城就得？」為題發帖，揶揄蟲炎：「平行時空下，姚松炎反對置富旁興建公屋，接收華富重建戶，計劃因此略被拖延，但同時又主動出擊，提出太古城旁可以起基層房屋。查實，置富同新華富距離，比較太古城住宅同鰂魚涌公園距離，相差好似唔太大？」
民主黨東區區議員張國昌也發帖寸埋姚松炎一份，話自己「勤派單張，經常接觸居民，是要向某些離地但又要與同路人競爭區議會出選權的人士證明，區議員是可以緊貼民情，發展公民社會，而不是該人物口中所謂的小圈子代議士。」
「自決派」嘅人不嬲都係咁目中無人，你哋唔係今日先知係嘛？如果唔知，就係知人不明，你哋錯；知都喺選舉叫人含淚投佢，亦都係你哋錯，正所謂「自作自受，與人無尤」也！未來，蟲炎仲會出嚟選，你哋有排受囉！■香港文匯報記者 陳川