宜家資訊發達，只要有手機在手，即使足不出戶，亦能知天下事，好似各馬房倉主咁，未必經常要喺馬房，因為宜家有片有相，可以輕易從手機傳送，倉主話要乜，班馬房手足即刻照辦，好似對各駒操練過程，可以叫工作人員用手機錄下，然後傳俾倉主睇，咁倉主亦可以傳番俾馬主，大家互相研究。講玩新科技資訊，苗禮德馬房亦十分前衛，近期馬房開咗個Instagram，記錄倉內大小事情，更妙就係倉主連助手操過一啲馬嘅報告都擺埋上去，供大家參考研究，呢啲基本上係馬房內部秘密，苗禮德肯公諸同好，可見呢位練馬師唔係獨食一族，大家可以去atm_racing搵搵。其實開呢個Instagram係苗禮德個女Dominique嘅主意，因為現今年輕一族有佢哋嘅社交平台，能夠廣傳就係最大目的。
睇完苗禮德呢個倉不斷有新資訊供大家研究，馬迷可以用正面眼光對待呢個倉，只要見旗下馬匹有水準，大家不妨多望兩眼，留心捧場，好似呢次出戰第六場三班千二米嘅「開心神駒」（圖前駒），上季在三班田草千二米贏「乘勢好運」後升上二班，再跑同一路程跟「駿皇綵」串Q，話晒二班都可以上名，今季評分調減下返回三班上陣，班次上經已佔到便宜，谷草千二米其實仲拿手，第一季在港上陣，呢隻馬插入三班，連續跑兩場谷草千二米得一冠一季，先輸俾「真先生」及「你知我心」得第三名，再出即以頸位贏「喜益善」。近期呢隻馬部署回谷草千二米列陣，上場由貝湯美騎，雖然只得第八名，但大家睇下只輸俾頭馬「和諧小子」三個身位，擺明已試準，呢次用番近期與苗廄最夾嘅史卓豐，顯然是動食指時候，呢系馬今次除「開心神駒」外，同晚仲有隻「快樂神駒」上陣，顯見「神駒」系喺今次夜賽磨刀霍霍。