近期見到啲騎師，有親友遠道來港探班，陣上必定賣力，好似沈拿個細佬月初從意大利來港，未幾沈拿即贏隻「好友益」，之後仲獲馬會發牌到季尾，又好似羅理雅個仔金寶咁，舊年到德國學騎馬，上個禮拜見佢出現喺沙田馬場，雖然趕唔切睇到老竇四月二日連中三元威風八面嘅情景，咁啱羅理雅上個禮拜兩日賽事都停賽，不過炒飯哥經常有馬贏，相信短期之內定可贏馬喺乖仔面前威威。上個禮拜除金寶外，其實仲有位千金嚟香港探老竇，呢位就係韋達個千金Sheikara，十八歲女據聞在英國讀緊書，趁放假嚟香港探老竇，於是上個禮拜三跟住母親喺跑馬地馬場出現，同朋友先打個招呼，不過當晚韋達冇馬贏，不過相隔一個賽馬日，憑羅富全馬房「威風霸皇」爆二十倍冷門，結果Sheikara可以同老竇齊齊喺凱旋門影威水相，所以話幾時有啲親人支持吓，鬥志都會特別好。沈拿、韋達都喺至親面前威水過，接着相信會輪到羅理雅停賽復出即威威，因為呢次夜賽，羅理雅一早卜定唔少實力坐騎，當中沈集成就有兩隻實力馬俾佢跑，分別係「泡泡達人」同「好益善」，前者係隻四五班升降機，一落五班就惡，近期狀態回勇，有值博賠率可以諗吓。不過講到穩陣，「好益善」就最值得睇好，呢次跑第七場第三班千二米，隻馬今季跑十次谷草千二米有六場上名，可以話準繩非常，呢次埋門狀態仍保持爭勝水準，兼且排埋個黃金一檔，真係唔可以睇小。