馬會近期有個新方法替馬匹藥檢，呢個新方法先嗰幾日至實行，就係每個禮拜突擊檢查兩個馬房，每個倉口隨機抽五隻馬出嚟驗，不過檢驗方法同以往唔同，以往唔係驗尿就係驗血，呢次係驗馬毛，點解要搞到驗馬毛，其實，要知道一隻馬有冇用過違禁藥，驗血或驗尿，只要過咗一個限期，往往好難驗到，但如果驗馬毛，有冇用過違禁藥，可以追番半年前咁耐，呢個新法相信起到好大效用。用過違禁藥嘅馬好難掩飾，唔通真係將隻馬剃到一條毛都冇。最近率先被抽查嘅馬房係沈集成同蔡約翰，沈集成嗰馬房受突擊檢驗馬中，有隻喺今個禮拜上陣，呢隻就係「上簽」，不過過得藥檢呢一關，證明隻馬冇問題。而呢隻馬正值大熟大勇，相信仍有大把上升空間，今次跑四戰全勝泥地千二米，雖然初上二班跑，但馬房一樣有信心可以替呢隻馬贏得季內第五場勝利。
「上簽」呢場升班戰要負輕磅跑，潘頓早有心理準備，諗住造磅都要騎，可惜上個禮拜喺澳洲犯規停賽兩日，呢次無緣替隻馬披甲，馬房即刻搵雷神幫手，雷神立即答應。其實雷神同場有隻實力馬「加州議長」可以揀，呢隻馬上場贏谷草千二米非常出色，泥地千二米過往有輕取「嫡愛寶」紀錄，所以點都夠卡士謀連勝，不過，雷神聽到有「上簽」騎，諗都唔諗就應承，可見呢隻泥地後起之秀幾咁吸引呢位冠軍騎師。「上簽」雖然經已贏咗四場，但今次賽前備戰一樣積極，上周五馬房搵楊明綸捱義氣替呢隻馬彈課泥地千二米大閘，起步第一隻跳出嚟，但未幾一路拖實，全程守喺第三位，就係咁嘅名次過終點，假如鞍上人肯俾兩步隻馬走，呢課大閘冠軍馬「志同道合」都未必可以贏到佢，呢課大閘連隻「志同道合」都咁搶鏡，由此可見「上簽」要贏得季內第五場勝仗非難事。