第二場、第五班、一八○○米。「通勝」嚟香港評七十七分插三班，一口氣減分直接落到五班，之後三季共贏三場，現時都仲喺三十六分水平，可見馬房控制評分得宜。上一場泥地同程起用郭能，起步後比平時跟得前咗，但中段步速太慢，莫雷拉「連利進寶」跑來機警，在外檔中段踩油直奔終點，可惜「通勝」仍唔肯發力，幸好末段「友歡笑」出意外，「通勝」保住第三；今次只要有快步速應可補中。
第五場、第四班、一二○○米。「威武再現」上仗初跑泥地，遇上濕慢變化場地都近，只以兩個多身位落敗，但感覺潘明輝未能完全發揮馬匹，但畢竟久休復出的年輕馬，初跑泥地經已接近，今賽前再由潘頓接手試閘，走勢吸引眼球，狀態更上一層樓。加上此駒血統上線源自IN THE WINGS，此系子嗣曾有「談唱劇」曾勝出杜拜世界盃，可見泥地性能佳；賀賢馬房近期轉運，今次捲土重來有望補中。
第八場、第三班、一二○○米。「旅遊皇者」今季自勝出泥地同程後，升三班兩仗都輸遠，前仗刻意留後被查詢跑法；上仗初跑谷草，排靚檔出閘笨拙因而失地，兩仗落第都可以講係情有可原，但其實四月時曾經試泥地大閘姿態十分吸引，兜兜轉轉今次終於回師贏馬路程，現評六十三分水平肯定仍未摸頂，交出水準有力介入戰團。