今晚沙田跑八場全泥地賽，跑埋今次，月尾尚有一次全泥賽事，頭場晚上七時十五分開跑，全晚唯一錦標是由二班馬跑一哩爭逐維多利亞賽馬會錦標。練馬師方面，蔡約翰、何良及徐雨石皆派出不少實力馬列陣，可優先留意。騎師方面，潘頓近期手風大順，值得重視，半冷可向黃皓楠及蔡明紹埋手。
第一場、第五班、一二○○米。「赤水神駒」季內第二回合已在潘頓胯下勝出泥地千二，贏馬姿態猶如大蝦細，可是拚後跑了大半季也徒勞無功，直到前仗改配郭能爭此程跑入冷位；上賽進一步殺入Q腳；難怪今次賽前潘頓亦過檔考驗，今次再戰五班此程，有力衝擊季內第二W。
第二場、第五班､一八○○米。「喜之星」喺今場賽事之中，單講季內表現佢敢認第二，應冇馬敢認第一，對上五場取得兩冠兩亞一殿，而自從轉戰泥地中長途後，戰鬥力有增冇減，經已找到最佳出路；前仗礙於濕泥關係，對後上馬極不利，牠自然是受害者之一，尚有亞季已感本事；上仗遇不利形勢亦追入配腳；假如今晚場地模式正常，躋身三甲應冇難度。
第三場、第四班、一二○○米。「金地飛客」近五仗四度得獎金已見走過低沉期，大前仗輸在騎師懶聰明，直路選擇不利跑線；前次則直路初一度受困影響發揮；上場轉配田泰安也沿用外遊戰略，惟拉士追勢凌厲跑入亞席；今次對手並非強嘅一群，只要配合形勢，入直路拉出外檔衝刺，力足取勝。
第四場、第二班、一六五○米。「經典帝國」雖然季中遠赴杜拜兩戰沙地賽表現均未盡人意，惟離港前三戰泥地賽事，第一W喺一哩大勝對手六個多身位，初跑泥地竟可視對手如無物，泥地性能勁到飛起；翌仗縮程角逐泥地千二米一樣可以入圍；到離港前復爭泥地一哩，廿八蚊大熱門後上取勝；而今次回師一哩路程，對手又是之前的一群，如「神舟小子」及「美麗鉅星」等，何來威脅性可言，只要重拾鬥心，在此可望再勝。
第五場、第四班、一二○○米。「八心之友」蔡廄鐵馬季內跑過十五仗，早前才喺谷草千二米取得季內頭馬；拚後加分轉戰泥地千二，閘前票如雨下，結果確有料到跑入冷Q；上仗渡江轉戰千二，快跟半程乏力只跑第六；打仔馬今次抖近三周，練者又報泥地千二誓師，環看對手實力非強，且戰且走仍有入圍之力。
第六場、第四班、一六五○米。「架勢」四歲A布馬季初因為進度未如理想，頭三仗陣上走勢一般，然而當其進入作戰狀態之後，表現就拾級而上，先於泥地千八米開糊；加分後改配蔡明紹操刀，仍能交出凌厲後勁再下一城；上仗大幅增程田草二千，全程跟跑表現乏善足陳；是次抖足個半月老蔡揀番泥地一哩出拚，途程最合腳法，有權打翻身仗。
第七場、第三班、一六五○米。「共創更好」季內跑過十四仗之多，僅獲兩亞兩季仍未一逞，再看上仗回配雷神出戰四班泥地一哩，雷神發揮已經一步不蝕，可惜最後影相負於「曾幾何時」時也命也；拚後加分又要復爭三班，對手雖強，但負磅如釋重負，仍有望交出好表現。
第八場、第三班、一二○○米。「精英寶貝」麥廄早熟快馬，初出角逐田草千二米，臨場有若干票數支持，一直徘徊十至十三倍，結果落敗而回；然而打後五場轉爭泥地千二米試出彩虹，全數打入前三名，表現與草地賽判若兩駒，看來草地與泥地的性能相距萬里。是賽練者再入紙出戰泥地千二，今回強敵已去，應可再嚐勝果。