早兩日「巴基之星」馬主擺慶功，出席者除馬房一班手足外，仲有馬經傳媒，甚至一啲馬會工作人員，如獸醫、釘甲等等，騎師竟有貝湯美，因為馬主同倉主經已表示隻馬下場跑遮打盃一定由貝湯美騎，因為女皇盃能贏馬捧盃，貝湯美都有功勞，佢同隻馬試好大閘至有得上陣，假如試唔好課閘，「巴基之星」想跑都難。其實貝湯美都幾黑，自從跟大摩拆檔後，個多月未有贏馬，對上贏嘅頭馬就係三月廿五日大摩馬房隻「猛闖」，假如要做個勢替「巴基之星」贏遮打盃，未來日子定要發奮圖強，起碼要有番贏馬信心，如果唔係，「巴基之星」可能騎一次就冇得繼續。貝湯美呢次日賽搵咗兩個鄉里馬房支持，一個係麥菲文，俾咗「至尊威龍」同「愛馬劍」佢騎，另外一個倉係蘇保羅，有「好準確」同「連利之星」交俾佢上陣，前者雖然係隻五班馬，但睇呢次日賽貝湯美幾隻坐騎，最有贏馬機會就係「好準確」，事關隻馬曾喺千四米以頸位輸過俾「銘記心中」，「銘記心中」今季贏三場頭馬，「好準確」輸俾佢無話可說，後來「好準確」喺場谷草一千米開齋，呢個路程其實嫌短，只不過質素稍勝對手一籌。上場初用貝湯美跑泥地千二米得第四名，屬27倍冷門，證明幕後信心睇淡，但可以跑入一席第四名，經已表示呢隻馬狀態開始返緊嚟，今次再用貝湯美跑，人馬有過溝通，千四米計落只係輸俾「銘記心中」，揸住呢個賽績，貝湯美應可贏馬破悶局。