今季冠軍騎師，雷神係咪篤定贏硬，目前帶離潘頓八場，但都唔夠膽講潘頓冇機會，事關一班同聲同氣澳洲練馬師，似乎都支持潘頓打抵雷神，最明顯係賀賢同蘇保羅呢兩個倉，近期多數搵潘頓作為出擊主力，呢季仲未成氣候嘅麥菲文，亦好多時用潘頓搏馬，至於蔡約翰同大摩兩個超級倉，以往用雷神出擊較多，尤其大摩，與貝湯美拆夥後搵咗雷神搏幾隻馬，不過，潘頓亦非善男信女，亦搵大摩支持，好似「美麗傳承」咁，交到佢手上接二連三交出好成績。至於蔡神仙，本來主力支持雷神，但大家睇吓，「旺蝦王」同「天下為攻」都醒俾潘頓，由此可見，潘頓真係得到各鄉里支持。
好似今次日馬咁，潘頓又喺大摩馬房搶到兩隻質新武器披甲，分別係「錶之太陽」同「標準猴王」。「錶之太陽」跑兩仗得冠亞，今次增程跑千四米一樣合適，所以基本上係潘頓叫糊馬。而「標準猴王」來港前贏過場千二米，不過運來香港前服役最後幾仗，已跑千四米及千六米，且有上名成績交出，咁即係講，呢隻馬並非短途材料，大摩初期訓練呢隻馬並不着急，跑過四仗來自三個唔同路程，所用騎師，場場唔同，上場郭能騎完後，今次即刻落到潘頓手上，顯然經過有關人等作穿針引線。其實，有時郭能部分實力坐騎是來自潘頓，好似郭能最近贏嗰隻「金碧光芒」咁，假如潘頓向幕後討回上陣，相信幕後唔會拒絕，因為早前「金碧旺旺」係由潘頓贏，「金碧光芒」潘頓如索騎，蘇保羅點會唔俾面，但潘頓留番俾郭能贏，證明佢哋都係識英雄重英雄，呢隻「標準猴王」上場由郭能披甲跑千四米，拉士衝得第五名，露光後今次轉由潘頓披甲，擺明唔計較賠率，熱一熱都想替幕後贏番場，大摩呢個順水人情做得過，起碼知道潘頓屆時必定搏老命。