上周六港澳盃圓滿結束，港隊繼續順利作出衛冕，兩匹澳門馬表現甚為差劣，雙雙被大幅拋離尾隨而回，然而澳門騎師今次來港作客卻有不錯的表現，其中應屆澳門冠軍騎師羅富全舅仔何華麟獲得冠亞殿各一，另外有「澳門莫雷拉」之稱的馬雅今次首戰香江也能交出亞季殿各一，而且坐騎賠率匹匹好分。最令人喜出望外的一定是尾場三班千四米賽事，兩人策「遨遊神駒」和「加州再豫」兩匹外檔馬盡顯騎功，包辦了二千多元大冷Ｑ，這是澳門騎師首度在香港賽事客串包辦前兩名，寫下光輝一頁。香港舉行完港澳盃盛事，翌日澳門馬會返回本地賽事，繼續馬不停蹄，而且仲係一年一度慈善賽馬日盛事，首回合六場沙地賽事場面相當熱鬧。上周六香港參賽四位騎師，重返澳門依然成為賽事主角，其中三位更加夫卜上陣，巴西好手馬雅因為在港於賽事末段垂手停止催策，被香港馬會罰咗四日停賽，難免會有啲唔開心，不過返回主場，馬雅擺到明想以頭馬一舒悶氣大殺四方，先以鄒欽華旗下「高而靜」快放到底，捧走工銀澳門慈善盃；繼而於第二場，再以十一歲老馬「勁強勁」摘下星河灣名門世家慈善盃起孖；跟住第三場再憑「好有運」贏出澳門馬主協會慈善盃；到第五場賽事名譽董事慈心盃，再勝出「寶寶傳奇」食出大四喜。本月廿六日新加坡舉行的克蘭芝一哩賽，除香港代表「馬上發財」與「川河尊駒」外，原本還有兩匹海外參戰馬，可惜英國代表「更待何時」因傷決定退出，而新西蘭代表「海霸王」將配上潘力德出戰。至於主隊擂台躉，現於星洲服役的「縱橫大地」，上仗於二級賽主席錦標賽由馬雅一擊得手，不過今次將找來法國好手巴度接手。據知馬雅因當日澳門本土有賽事舉行並有聘約，因此未能成行，馬雅於剛周六來港客串，因末段垂手被罰停賽四日，罰則將在六月份執行，如今又無法前赴星洲出爭大賽，可謂雙重損失。
另一方面，講起全球最受注目嘅騎師賽，每年於英國雅士谷馬場舉行嘅識價盃騎師對抗賽，肯定係其中之一，近年亦有唔少喺香港發展嘅騎師參與呢項盛事，好似前馬壇神童蔡明紹喺一二年成為該屆識價盃成績最好嘅騎師，攞埋銀馬鞍獎，去年就由郭能有份嘅愛爾蘭騎師隊攞到隊制冠軍。今屆識價盃騎師對抗賽將於八月十一日舉行，目前喺香港騎師榜領先嘅莫雷拉（圖左二），日前接受一間英國賽馬傳媒訪問時，透露自己已獲邀參加今屆賽事。其實莫雷拉曾於一三年以世界騎師隊成員身分參加識價盃，依家又可以再去英國參與呢項咁特別嘅賽事，難怪佢都話非常期待，希望攞到好成績。