雷神在五月十二日騎「龍船」犯不小心策騎而被罰停賽兩日，由六月五日開始執行，雷神選擇半個月後至服刑，顯然近期有唔少實力馬出擊，正如今次夜賽嘅「麯院風荷」，大有取勝條件。
蘇偉賢好想同呢一系馬贏番場，除「麯院風荷」外，馬主兒子仲有隻「霽月高風」養喺呢個馬房，早前「霽月高風」季內曾用雷神搏殺，點知不敵「紫雲星」，輸條頸得亞軍，最近跑直路賽，搵黃俊減十磅出擊，俾「瑩之光」以短頭位影贏。其實呢隻「麯院風荷」今季成績仲衰過「霽月高風」，整季到目前為止跑咗十二仗，僅得一次上名，與上季相比簡直有天淵之別，上季有三冠三亞，雖然隻馬今季年紀大咗一歲，但只係七歲唔算太老，大家睇睇「麯院風荷」目前身處班次經已比以往降低一班，肯定係有反擊能力。
「麯院風荷」上場跑泥地千二米經已降落四班上陣，不安排出戰有佳績嘅谷戰千二米，反而揀跑泥地千二米，目的當然是仄隻馬狀態，跑完呢仗，今次由史卓豐換上雷神，顯然是一個打硬仗嘅配搭安排。因為呢隻馬上季由雷神贏過兩仗，後來由柏寶接手再贏多一場。而「麯院風荷」季內跑過十二場，從未有一場是配雷神披甲，今次配搭明顯唔同，顯然有搏殺誠意。
講開雷神配呢系馬是打硬仗嘅保證，話題又再扯回「霽月高風」身上，呢匹馬今季亦兩次配過雷神上陣，其中一次當然是之前講過得第二嘅表現，另一仗雖然是落第，但亦能得一席第四名，可見雷神接呢一系馬上陣，鬥志絕對鮮明，今次「麯院風荷」跑番最拿手嘅谷草千二米，若能跑番上季贏馬水準嘅話，呢批四班馬又怎能敵得過，即使表現稍為遜色，能夠跑回八成水準，相信在此經已有也文也武本錢，蘇偉賢大可憑此駒再增添頭馬成績。