早前洪祖杭將三隻馬拉去羅富全馬房嘅馬圈新聞，有報道指出，因為有關人等不喜歡用韋達騎「火箭駒」為導火線，講真轉馬房事件，冰封三尺非一日之寒，原因扯到韋達身上，確係令當事人有點無耐。呢位十三屆冠軍無疑表現今非昔比，始終跑馬是項體力運動，能夠在馬背上成為長青樹者，真係唔多。韋達聽到人彈劾佢之際，近期的確回勇，除「輝煌星」、「快利寶」贏中短途賽外，最近又喺長途賽上贏「乘勝追擊」，呢幾場頭馬可以話爭氣之作。其實，曾經傳過韋達下季會當大摩副練，諗住學一年半載嘢，出年有機會坐正，不過呢個傳言，上次日賽韋達跑完馬後，接受記者訪問時否認了，認為自己仲騎得，冇理由唔騎落去，亦已入紙申請下季牌照，當然，佢入得紙，牌照一定有，呢位十三屆冠軍依然有唔少馬主支持佢，部分華籍倉口，依然樂於用十三少搏馬，其中一位就係徐雨石，呢個倉向來對騎師非常好，唔會亂咁換人，只要你交到水準，坐騎下次依然會由同一個人跑番，絕對唔會郁下手就俾人搶走，韋達今季未同徐雨石贏過馬，但早前交隻「清新動力」（圖8號）俾佢跑，雖然只得一席第五名，但只輸唔夠一個馬位俾頭馬「嬴風雲」，於是幕後想用番佢跑，但韋達一早應承咗高伯新騎隻「快利寶」，所以迫住「清新動力」改用田泰安出戰，結果兩隻都輸咗，不過，後來「快利寶」再出，即刻喺韋達胯下開齋，證明韋達冇揀錯馬，「清新動力」轉谷草一哩出擊未成功，上場返回田草千四米配番韋達即獲亞軍，雖然又搏輸，但馬房今次依然搵番韋達騎，皆因佢跑呢隻「清新動力」有板有眼，今次十三少有機會再威威，季尾食番幾鋪糊，下季續牌依然有信心可以幫到馬迷及馬主贏到錢及贏到馬。