係咪吃不到的葡萄一定是酸的，咁就睇吓點樣證明呢粒葡萄真係酸的。話說第五場第四班跑千二米隻「好甜橙」，由於上手馬主仙遊，所以重新投標，易主後由姚本輝馬房轉去徐雨石倉，呢隻「好甜橙」乃倉主幫上手馬主入貨，所以質素有番咁上下，大家都知道，輝哥入短途馬有一手，呢隻「好甜橙」經過佢過目一定唔會曳，當然，大家睇睇隻馬轉入徐雨石馬房後，第一仗出戰即在千二米輸俾「快利」跑亞軍，後者剛從三班降落冇耐，「好甜橙」輸俾隻三班馬都冇得好講，今次再跑千二米用番田泰安，大家必定繼續捧場。但正如之前所講，係咪吃不到的葡萄一定是酸的，姚本輝冇咗呢隻揀手馬，其實，只要喺呢場證明佢手上訓練嘅馬，一樣有能力取勝嘅話，咁即係講，有好馬仲要配合一位出色練馬師方可發揮威力。姚本輝今場用王牌報名「小鳥敖翔」，報名後延遲加入仲有隻「雷電寶」，後者上場在一千米直路賽跑季軍，呢場都唔係姚本輝正選出賽馬，計實力隻馬絕對有本錢在三甲佔一席。不過姚本輝放晒成擔心機喺隻「小鳥敖翔」身上。呢隻馬前次千二米想偷「友瑩囍」雞，後者大家都知道是匹質高馬，雖然未能成功偷到「友瑩囍」雞，卻經已顯露「小鳥敖翔」四班必有贏馬本錢，上場再出被捧成兩倍半大熱門倒灶，賽後分析是前次偷雞體力透支的代價，不過如今經有充足時間復元，呢次有晒信心可以補中，「好甜橙」要贏就係要過呢一關。