為人父母，幾時都望子成龍，姚本輝終於達成心願，新季愛兒姚浩豐可正式成為副練，入馬房幫佢手，愛兒現時在徐雨石馬房當馬房領班，今季徐廄成績唔錯，佢都有功勞，由於牌照下季至生效，姚本輝兒子仍要喺徐廄上班，等到七月份至開始轉職前休假。姚本輝新季有得力助手，心情自然靚。今次夜賽，姚廄有匹「航天勇將」（圖前駒）重新谷起狀態，準備在今次第四場四班千二米出擊。
「航天勇將」季初先喺場一千米直路賽取得第三名後，再出轉跑谷草千二米，結果順利補中，不過喺往後賽事就未能再有頭馬交出，據馬房手足所透露，令到呢隻馬徘徊不前嘅原因，多少係隻馬提唔起角逐興趣，而且在食慾方面亦比以前減少。馬房喺雷神騎牠跑入位置後，立刻安排去放草一段時間休養生息，所以由一月底至二月中，「航天勇將」晨課冇見成個多月，直至二月底至開始重新打磨，呢次安排由郭能負責操練，但好奇怪，「航天勇將」休後復出第一仗，卻安排跑千四米，一個以往跑過一次，但輸二十多個馬位嘅路程，呢一仗最後所得名次係第七名而回，跑完呢一仗，馬房再安排隻馬跑場泥地千二米，而跑泥地千二米屬「航天勇將」第一次，結果由田泰安操刀，成績亦未如理想，又係得第七名。喺「航天勇將」小休復出後，馬房刻意安排隻馬跑兩場並非最正宗出擊路程，目的只有一個，就係俾隻馬有新鮮感，當然呢個新鮮感未能替「航天勇將」立刻贏取頭馬，畢竟路程無贏馬根據，馬房便當呢兩仗屬熱身賽，今次先至係馬匹出擊嘅真正目標。周四報名入紙前，呢朝乃上周日戰馬最後試跑日，馬房卻經已安排呢隻今周三出賽嘅馬由史卓豐過檔，快試八百米，從準備動態所見，幕後經已一早做足工夫而臨，目標係鎖定今仗。