早輪「紅衣醒神」轉投羅富全馬房，有人謂係歸隊，因為同主嘅「紅衣優駿」早已放喺羅富全馬房。「紅衣醒神」喺蔡神仙倉已無再進一步成績交出，轉換環境係在所難免。事實，「紅衣醒神」轉倉亦係因為跟成績停滯不前有關，另一方面就係蔡廄現時嘅短途好手越來越多，「紅衣醒神」喺呢個馬房已由一等兵淪為二等了。早前嘅「天下為攻」，大家都見佢犀利之處，仲有一匹「旺蝦王」，呢的都係未來接替「翩翩」、「紅衣醒神」嘅短途新秀，幕後自知與其日後「紅衣醒神」淪為二等兵，現時轉換環境亦係適當嘅時候。「旺蝦王」呢匹蔡廄未來短途鎮倉寶，到目前為止六戰取得五冠一亞，兩場頭馬係喺上季取得，另三場就喺今季，最近一場跑田草千二米僅輸俾「有理共想」獲亞軍，賽後檢討「旺蝦王」敗因，除初跑轉彎路程外，最慘係呢仗初段隻馬搶口，頭兩段跟「獅子驄」及「加州福星」等惡馬搶急咗，變成末段力弱，亦俾咗「有理共想」一個可乘嘅機會。經過此戰大意失荊州，馬房作出重新部署，給予「旺蝦王」逾一個月嘅休息時間，重新向牠施以辣磨工夫，今次賽前馬房安排隻馬彈兩課泥地千二米大閘，均由潘頓親自考驗，一課得第四名，另一課得第一名，走勢非常悅目。今次渡江目的擺明「屈機」，因為來季要有足夠評分部署各項大賽，現時一百分左右係未足夠，贏埋呢仗，評分近百一分，下季在各級際賽上部署，蔡神仙便可隨心所欲了。