連續三個賽馬日冇開飯嘅蔡約翰馬房，今次夜賽出動「旺蝦王」呢匹未來短途鎮倉寶，仲配合埋其他實力馬列陣，相信又係大殺三方時候。今次馬房出動五駒跑是次夜賽，其中四駒上周與今周嘅備戰過程都係一模一樣，呢四匹戰駒分別是「魅力星星」、「歡喜心」、「旺蝦王」及「話得事」，呢四隻馬埋門點樣操練？原來根據班馬房手足透露，上星期五、六及本周一、二，蔡約翰均安排咗呢四隻馬拍踱，通常係「話得事」拍「旺蝦王」一組，另一組係「魅力星星」拍「歡喜心」，四駒操練形式是先一齊到機坪踱步，後再去游水及照太陽燈，四隻馬均進行炒三味活動，據悉狀態進展非常理想，手足指出，尤其係「魅力星星」及「話得事」，呢兩隻馬近日在馬房地下馬格，由於非常好火關係，兩駒互相撩對方打架，好彩當時的工作人員亦非常醒目，密切留意呢兩隻馬嘅事態發展，一唔對路立刻將佢哋分到另一個馬格擺放。「魅力星星」早幾日未換出賽銻甲時已表現得非常好火，經常在行街時起雙飛打腳，引致後蹄甲幾乎鬆脫，馬房手足急急召釘甲匠替牠加釘，一直撐到埋門換上出賽銻甲為止。此駒乃女馬主鄧詠琳所擁有，賽前更見佢專登帶備紅籮蔔餵愛駒。「魅力星星」經過三場熱身賽後，最近一仗跑田草直路賽得第四，明顯已有進步，今次轉戰谷草千二，賽前曾經試過一課谷草一千米大閘得第二名，場地也合發揮，千祈唔好睇小呢匹質新馬。
話得事趕上尾班車
至於同「魅力星星」一齊撩交打嘅「話得事」，屬前主席夏佳理有份嘅團體馬，來港前在愛爾蘭贏千四及千六米，但嚟咗香港之後，跑中距離嘅表現都係麻麻，蔡約翰觀察咗一輪，條頸始終硬唔過張刀，最近終於向現實低頭，同呢隻馬安排番短途上陣，最近一場列陣谷草千二米，採狂搶領放戰術取得亞軍，經過牛刀小試後，馬房替佢安排逾兩個月休養回氣，今次跑尾場三班谷草千二米賽事，相信必把握贏馬機會，勝回一仗向幕後交代。
旺蝦王馬主往探班
至於「旺蝦王」，上次跑田草千二米，首次角逐轉彎路程，臨場依然有好多人睇好呢隻「蝦」定可適應，不過，因為初跑田草千二米有新鮮感，加上同場有唔少快馬例如「加州福星」及「獅子驄」與牠鬥搶，結果出現一個前快後弱現象，再遇到「有理共想」爆一段偷襲，所以嗰次「旺蝦王」只係輸經驗，馬主劉錫康起初亦耿耿於懷，愛駒未能保持不敗紀錄殊為可惜，不過，馬主劉諗深一層，要擁有一隻長勝將軍又談何容易，昨午入馬房又再笑口盈盈，與愛駒拍個照，始終作賽前鼓勵，希望「旺蝦王」今次轉場一樣跑得咁好，所以今次「旺蝦王」列陣，台前幕後一樣抱有相當信心。
至於隻「歡喜心」則長期有態，但評分經已摸頂，大家可以位置當W賭，講完蔡約輸四匹機會馬，有人會問，仲有雷神隻「精算八方」，呢隻馬並冇上述鏡頭出現，馬房只安排匹馬行機活動，相信是以慢工夫保持體力，論態則保持勇境。