通常一個好嘅高層，我哋都會用伯樂嚟形容，為嘅就係想讚美佢眼光獨到。但嚟到現代賽馬，練馬師除咗要為馬主購入良駒之外，安排馬匹操練同出賽，甚至維持馬房秩序亦係重要一環，所以與其話當今練馬師係現代伯樂，不如話佢哋係馬房入面嘅將軍會更貼切。當然，以各倉主嘅知識，無論處理倉內大小事務，肯定游刃有餘，但正所謂十隻手指有長短，各有強弱項，亦係理所當然。而作為一倉之主，各練馬師都能夠選擇將較多時間分配於自己擅長嘅部分，盡展所長。作為圈外人士，大家最上心嘅，應該係當練馬師夥拍馬匹於晨課中露面，因為呢個通常會被視為出擊信號。但其實諸如打料等嘅敦龰A練馬師都有機會親自操刀，可想而知其忙碌程度，實在遠超各位想像。
既然如此日理萬機，有個靠得住嘅助手梗係唔少得。有見及此，練馬師之下設有副練一職，及至未來從化訓練基地開張大吉，每個馬房將會加多一位副練，以確保兩地馬房運作暢順。基本上，副練工作與練馬師大同小異，而由於不時有機會接觸馬主，久而久之亦會建立起人脈關係，為未來開倉之路打好基礎。雖然副練聽落好似同練馬師有段距離，但如果練馬師係過江龍，初到貴境又人生路不熟嘅話，副練嘅人脈就能夠幫佢爭取馬主支持，由此可見副練亦確係唔簡單。