告達理雖然疊埋心水等退休，但唔代表啲馬唔博，因為支持開佢班馬主，咁多年都冇離異之心，去到呢個階段，倉主又點會唔報答番佢哋，好似上個禮拜隻「神威敖翔」咁，由莫雷拉贏完場四班賽，上三班轉由潘明輝爆半冷添食。又好似周三夜賽咁，「時尚風格」搵蔡明紹中段踩油，諗住三十三倍馬食大茶飯，點知終點前影相輸俾「本事」，唔能夠爆冷成功冇得好講。今次大家不妨吼吓第八場跑三班千二米隻「發財先生」，雖然睇綵衣，呢隻馬唔係常見支持開告達理，但大家細心睇睇，呢隻係今季自購馬，一個弱勢倉口，今季成績唔好，幕後依然將隻質新馬加盟，顯見幕後同倉主交情非淺，否則一匹質新馬，好話唔好聽唔愁冇地方收容。「發財先生」一班幕後咁支持告達理，呢隻馬加盟告廄後，可以話屬呢個倉唯一新血，雖然跑過三仗無功，但前仗跑千二米，呢隻馬在蔡明紹胯下衝得第六名，只輸三個半馬位俾頭馬「輝煌星」，由於「發財先生」來港前在英國三捷均屬中距離，兩場千六米，一場千四米，所以千二米一戰後上有走勢後，再出即報戰千四米，以為更合性能發揮，但上場跑千四米表現卻令人大失所望，其後馬匹經檢驗後，發覺不良於行，幸好情況輕微，好快復原過來，今次馬房安排隻馬跑番千二米，路程雖稍短，但佢哋深信，憑呢隻馬卡士，三班賽佔到優勢，何況更請得雷神執韁，情況有多少似「神威敖翔」，屆時又可屈機。
