李易達與鄭俊偉，一場「駕迅」與「真跑得」之別，變成兩個馬房上岸環境大不同，「真跑得」險勝「駕迅」，假如「駕迅」影贏嘅話，上周日李易達便能起個孖，頭馬數字經已達到十五場，餘下賽事只要贏多一場便能上岸，不過最終由「真跑得」影贏，現時鄭俊偉就有十五場頭馬，相比起目前僅得十四Ｗ嘅李易達，前者上岸機會就容易過後者。「駕迅」沈拿搏失，老套一句只能怨運氣。不過，馬房士氣未有低落，副練黃志雄依然力撐阿頭，假如李廄季尾頭馬數字未能達標，馬房就要解散，現時各馬房差不多已有個副練，僅葉楚航呢個馬房仲未有，李廄若未能續牌，黃志雄可能要到別廄當第二副練。不過，去到呢個時候，李易達上岸要靠上下齊心，今周「駕」系馬派一駒列陣，出戰第一場五班泥地一哩，鞍上人仍然用番上次搏失同系馬「駕迅」嘅沈拿，足見幕後冇怪責沈拿，也希望騎練及馬房上下齊心，可以齊渡難關。
「駕喜」落到第五班可以話佔盡形勢之利，因為上季呢隻馬仍可以在四班泥地一哩建功，所贏對手「旅遊大使」及「喜得龍」，都係具有戰鬥能力，但今季到目前為止，卻三甲都未入過，上場至由四班降到落五班出戰，馬房安排牠跑泥地一哩，賽前狀態麻麻，以十一倍半冷身分跑得第五名。輸俾頭馬「勇晉神駒」三個半身位，本身只是跑質素，當跑完呢場泥地一哩後，復課馬房加強磨練，上周四交由沈拿過檔備戰，論狀態當然好過上仗。大前季呢隻馬可以一口氣連續贏四場千六米升上三班，呢隻馬戰鬥能力如何，相信大家唔會陌生，但高峰期過後便一沉不振。今季十一月由文家良馬房轉投李易達，話唔埋係李廄今季救星，因為隻馬贏完呢場五班賽，大有機會再度連珠炮發幫李易達成功護級。