今日跑馬地八場草地夜賽，為今季谷草煞科戰，今季跑馬地合共十次用A欄作賽，睇番最近六月六日同一移欄八場賽事，全晚並無進行壓地，依照季內A欄一貫特色，普遍大利前置馬匹進取，排一檔馬贏四場。回顧當晚頭馬跑法：兩場一千米，「驫驫」守前列大熱贏馬、「叫關健康」跟前建功。兩場千二米，「赤水神駒」十二檔搶出慢步速放到、「傳奇」慢步速居中間位置建功。三場一哩，「駿協精英」後來居上順利開齋、「萬事醒」守前列位置得手、「靚紫荊」轉跑法跟前贏馬。一場二千二百米，「勁哥兒」馬少場合後上大熱掄元。練馬師方面，上次谷草A欄何良起孖，另外告東尼近三次谷草A欄都有進帳。騎師方面，今季十次谷草A欄，潘頓除4月11日停賽外，餘下九次都有馬贏，合共交出十二場頭馬。今次推介葉廄「赤水神駒」，前仗谷草千二排大外檔照贏難度高，質新未止境，可繼續吼。