睇雷神與潘頓喺上次日馬四比四嘅連場火併鏡頭，最開心當然係呢兩位騎師嘅擁躉，一日內有四條埋Q成績，相信不少馬迷已有斬獲。今次雷神同潘頓嘅坐騎值得留意外，尚有一位仁兄嘅坐騎要留意，佢便是祈普敦，原來這位澳洲騎師已不經不覺有接近兩個月冇贏過馬，今次獲蔡約翰「常豐裕」（圖7號）支持，料必把握機會替這駒數糊。
許多人會問，為何「常豐裕」上場由雷神取勝，今次雷神則棄騎了牠，而取了文家良馬房「雷霆導彈」？當中原來有個小誤會，搞到雷神作錯抉擇，上場「常豐裕」取勝後，馬房向幕後交代了，原本想把這駒提早抖暑，所以雷神以為這駒不會在今季再上陣，而文家良的「雷霆導彈」由於脾氣大，加上韁口重，並非容易策騎，於是一早搵了雷神上陣，亦表明會在谷戰煞科日報名，於是雷神答允了上陣，不過，「常豐裕」本來打算提早抖暑，但倉主見牠食得擦得，狀態與上場取勝無異，於是有謂食得唔好嘥，馬房臨時臨急再萌報名念頭，亦想找回雷神披甲，但雷神一向重口齒，指出已應承了文家良的「雷霆導彈」，分身乏術下唯有推辭，蔡約翰見此情況，又見鄉里祈普敦好耐冇頭馬進帳，於是找來祈普敦披甲。
朝五晚九激賞單Q
昨早大約五點半左右，已見祈普敦與田泰安出現於蔡約翰馬房，倉主安排「常豐裕」及「激賞」於地堂由助手踱步，稍後再教閘，兩位騎師及倉主喺欄邊睇加課過程，事後齊齊入寫字樓傾戰術。據悉，兩駒狀態都好弗，後者「激賞」列陣場合，雷神取了「朝五晚九」披甲，而今次真真正正係雷神揀馬騎，但馬房認為「激賞」細粒仔近期狀態依然靚，上場田戰得殿軍敗不作準，今次返回谷草千二米開齋路程，提防雷神與田泰安兩老友一Q而返。
史立德探兩先生班
「先生」系馬主史立德，昨早亦一早出現於沙田馬場探班，他先到賀賢馬房睇「索先生」，期間有倉主及史卓豐陪伴左右，倉主安排「索先生」由馬房得力騎馬人劉家泰踱步，三人企喺欄邊睇踱步過程，踱後再入寫字樓傾偈，睇動態今晚「索先生」應是賀廄主力出擊分子。當史立德睇完「索先生」之後，隨即便到何良馬房睇另一匹列陣愛駒「威先生」，只見呢匹馬經已被安排由一名外籍助手踱步，在場有何良及副練梁明偉招呼馬主，一路觀察期間，正副練及史立德傾過不停，似乎對呢隻「威先生」是滿肚密圈，睇重態如此緊張，今晚一對「先生」，大家可以留意捧場。
鵲橋飛渡要風得鋒
高伯新馬房昨早對兩匹戰馬非常重視，分別係列陣五場三班千八嘅「鵲橋飛渡」同三場四班一千嘅「要風得鋒」，前者用馬房助手踱步，後者由潘明輝踱，在場有高伯新及女秘書監督，後者火氣十足依然見靚，至於「鵲橋飛渡」馬身肌肉收得結實，毛色油潤，狀態經已銳利，兩隻近況一流馬，有機會替高廄取得頭馬。