■祖藍與亞男今年成功造出「愛情結晶品」。 資料圖片拍拖9周年紀念日 晒超聲波照報喜
香港文匯報訊（記者 植毅儀）王祖藍與李亞男結婚3年，一直都好努力造人，昨日終於有好消息！亞男昨日晒超聲波相報喜，宣佈懷孕，又加上「Love you」及心心圖案，心情興奮，並寫道：「今天是我們拍拖9周年紀念日，很興奮感恩可以在這個特別的日子宣佈我和祖藍將迎接一個新生命嘅來臨！so blessed to have a new life in our family ！Happy 9th anniversary！」 而好姊妹王君馨同苟芸慧均替亞男開心，而君馨更表示隨時ready做契媽。
昨日祖藍與亞男於社交網宣佈有喜！準爹哋祖藍好開心話：「首先好感恩喇，可以喺拍拖9周年紀念日去宣佈呢件事，我哋拍拖嗰時係2009年，咁啱9年後有個小朋友，咁希望所有嘢都可以長長久久啦。亦都好感謝上帝，幫我哋安排晒所有嘢都喺計劃入面進行，真係好感恩。」祖藍更叮囑大家幫忙「睇住」老婆，盡顯「暖男」本色：「做媽媽真係好辛苦，佢為BB付出咗好多，又睇書啦、又改變自己飲食習慣啦，又好緊張去預備好多嘢啦，所以麻煩大家照顧佢。」
向鍾嘉欣宋熙年取經
而亞男就說：「好開心終於做媽媽喇，第一時間知道嗰陣真係好驚喜，同埋有啲唔敢相信。因為我哋雖然係plan今年做爹哋媽咪，但冇諗過咁快就實現到，真係好感恩。其實仔定女我都冇所謂，因為我都會好鍾意。最緊要係BB嘅成長過程夠健康，同埋佢嘅成長夠開心快樂。」
亞男又謂已向一眾好姊妹分享喜悅：「我有向鍾嘉欣同宋熙年取經，問定佢哋有咩嘢唔食得，同埋可唔可以做運動，真係好多好多問題想問，始終自己冇經驗。」她又謂為了BB着想，已對十分喜歡的食物盡量say no：「我食少咗好多甜品，同埋飲少咗好多咖啡，我以前可以一日飲幾杯！雖然呢啲都只係好小嘅事，但已令我體會到做媽媽係需要付出好多嘅愛。」亞男又承諾現階段會好好take care自己，多點休息，為升呢媽咪做足準備。
閨蜜君馨想做契媽
閨蜜王君馨表示為對方開心及送上祝福：「首先戥佢好開心，因為佢ready想做媽咪有一段時間，所以現在畀佢好健康、好幸福咁佗一個BB。呢段時間佢都學做一個好老婆，成日煮嘢食。Leanne（李亞男）一向是一個好有愛的人，相信佢是一個好媽媽。祝福佢非常健康，呢幾個月都心情可以好好，有多啲時間休息。佢有咩需要，我們都在佢身邊陪伴佢。」問到會否想做契媽？君馨說：「如果Leanne想， 我好樂意的。Happy to be here n love her n support her。」
苟芸慧開心回覆：「恭喜祖藍同亞男，好期待見到佢哋嘅BB出世，佢哋一向都好鍾意小朋友，亞男性格賢淑，相信一定會係個好媽媽，真係戥佢哋開心！」
另一個好姊妹岑麗香就稱比大家早少少知道喜訊，當時已當面恭喜亞男，「當面恭喜佢哋啦！同祝Leanne佗BB佗得唔辛苦同到時順順利利生一個好得意嘅肥肥白白B！」