■謝霆鋒爆料，當年練住詠春拳開解陳偉霆(左)。香港文匯報訊 Viutv播映的《鋒味前奏》差唔多去到尾聲，今晚播出尾二的一集，主持火火就同謝霆鋒大講他的閨中蜜友好兄弟。原來現在在內地爆紅的陳偉霆曾經同霆鋒去公園訴苦，霆鋒以過來人身份，鼓勵對方唔好放棄，因為自己都捱咗好多年。
今集霆鋒示範三文魚鮫同三文魚刺身的做法。點解今集整三文魚？霆鋒就話因為上次拍攝《鋒味》時，同咗老死馮德倫去到挪威，馮德倫話想食現場、當地食物，剛巧霆鋒又拎咗條三文魚，於是就即席整咗呢味菜式，霆鋒話：「我發覺當你自己識得開雞、開魚，這樣會平好多。我們識咗好耐，以前我們係鄰居來，我住樓上，佢住樓下。」
自認是聆聽者角色
霆鋒一向畀人有種cool到爆的感覺，於是火火就問佢如果要數圈中好友，可以數到幾多個呢？霆鋒就話自己好慶幸，仲可以好自豪咁講都幾多，「我最記得我細個時，阿媽同我講咗一句：『一個男人的成功，唔係睇你銀行有幾多個零，係睇你可唔可以數得出你有幾多個好的知心朋友。』」火火又好疑惑地問：「你會願意俾人知你的心事？」霆鋒就話自己在朋友入面係聆聽者角色，仲搞笑咁話：「尤其是當你有些好似陳奕迅咁樣物體在你對面時，你冇得講說話。」雖然作為一個聆聽者，但霆鋒話冇諗過自己講的幾句說話，會對人影響咁深，霆鋒說：「我真係覺得我好幸運，有陣時朋友又會講得出一些事，係我唔知我對他們來講，原來都咁有意義。有次陳偉霆講番，佢未爆紅之前，原來佢好記得我帶佢去邊個公園、去練過詠春，那陣時成日同佢講這些，『唔好放棄呀！我都捱咗好耐啦......』我唔知道原來對一個人的影響可以有咁深，隔咗咁多年。」
很少同人講心事
咁霆鋒低潮時，又有冇遇到一個聆聽者呢？霆鋒就話自己係相反，唔識得做講那個，「我好少同人講心事，都唔會同父母講，呢個可能係我咁多年的性格。」佢仲好肯定自己呢個性格唔會變，「都經歷足夠的事，知道會過，𠵱家又睇開咗，所以更加唔需要訴苦，好快會過去。」