■「明記甜品」發出聲明指涉事的甜品店與他們並無關係。資訊越來越發達，帶來的其中一個缺點就是為求快，很容易「殺錯良民」。話說衛生署衛生防護中心早前公佈，有7人分別在西灣河街甜品舖「明記」進食後懷疑食物中毒，《蘋果日報》在即時新聞報道中，就以「明記甜品」的門面作為配圖，殊不知誤中副車，最後只得鬼祟改圖了事。
元朗小店俾人「羊肉當狗肉」，民主黨立法會議員鄺俊宇連叫自己啲細嘅「同朕check吓」都費事，就叫人廣傳該小店賣狗肉的消息，結果累到人哋幾乎執笠，呢件事大家相信都記憶猶新，但估唔到呢件事之後，仲係有傳媒同自稱從政者繼續咁樣是是旦旦。
事緣衛生防護中心早前公佈，有7人於8月5日分別在「明記」進食芒果蛋白後懷疑食物中毒，《蘋果》在報道該宗新聞時，就配上「明記甜品」的圖片，曾經參加過筲箕灣區議會選舉的中學教師梁詠詩，也在fb分享了《蘋果》的即時新聞。
被「間接點名」的「明記甜品」隨即發出聲明，指涉事的甜品店實為「明記糖水」、「明記咖啡糖水小食」，與他們並無關係。
網民批「點做新聞﹖」
要選筲箕灣區議會選舉，但就連區內邊間舖打邊間舖、有份share《蘋果》而中咗招梁詠詩，梗係唔想得罪街坊，搞到明年區議會選舉多咗一班襯家啦，所以就連發兩帖補鑊，講清楚西灣河的確有兩間不同的「明記」，然後就賴《蘋果》：「蘋果日報將不同的『明記』相片拼在一起，於是造成了誤會。」
網民「Nat Nat」狠批：「離晒大譜，出相時唔check清楚地址先出，點做新聞？咁既（嘅）錯都出得！......佢地（哋）一個低級錯誤影響人地（哋）商譽，改過張相當無事，離譜！」
■香港文匯報記者 陳川