羅富全上季開倉立萬，最終以六十五場頭馬穩居練馬師成績榜亞軍位置，雖然與師父蔡約翰尚有廿二場頭馬的差距，但首季練馬已經有咁好成績，得到馬主們的認同，其實已經相當難得，尤其是羅富全開倉初期的兵力其實相當普通，不少戰駒只係成就一般的舊馬，但仍然可以在季初階段慢慢向上游，並且得到更多馬主支持，造就羅廄季尾階段攻勢源源不絕，彈甩季軍告東尼十二場之多，反映羅富全絕對係個有料之人。
事實上，剛季羅廄有不少代表作，好似「鑽之友」首三季服役時只取得兩勝，但由他接手後首三仗全勝，中年馬能夠突破自己，取得盛年時亦未能取得的佳績，可以話係意料之外，而且羅廄用完之後，季尾階段已經掃走此駒，騰出馬格暑期容納新血，此舉甚有其師蔡約翰的風範。
羅富全上季另一代表作係「銘記心中」，該駒在港首三季均未贏過，但由他接手後轉弱為強，首四次上陣取得三場頭馬，其後升上四班未能再上，雖然季尾重返五班曾經取得亞軍，但馬主亦讓此駒提早退役，可以安享晚年。總括來說，羅廄上季部署係季初盡用中老年馬，季中階段等質新馬成熟後立即接力上位，令到羅廄整季攻勢不斷，而且有不少馬匹取得多捷，估計新季羅富全仍然會沿用同一作戰模式，季初階段派遣中年馬打衝鋒。