■陳家樂扮華仔的準備功夫做到十足。香港文匯報訊（實習記者 張雅婷）陳家樂早前終於有機會跟多年的偶像劉德華合作，拍攝電影《掃毒2》。他自言見到偶像會令他腎上腺素上升，而為了向偶像致敬，他日前就將華仔的《暗裏着迷》MV經典再現。
家樂表示翻拍翻唱這首歌，是因為這是他最愛的歌，「早排我同劉德華拍戲，都有同佢傾偈，佢咁多首歌我最鍾意係呢首，同埋係最經典。偶像演技好勁，因為原裝MV係一take過拍攝，所以我都想試吓。」
為了這個MV，家樂的準備功夫真是一絲不苟，除了入錄音室重新錄製歌曲外，髮型方面，試髮型都試了好多次，他說：「MV入面其中一個亮點係撥頭髮，我會喺屋企對住塊鏡練習撥頭髮。」至於化妝方面，家樂說：「放飯時間，妝都無落，就咁除咗個假髮就去食飯，食食吓，隔籬枱誤認咗我係劉德華，勁開心，哈哈。」
除此之外，家樂話最難忘是MV尾段淋花灑部分，「我哋係拍咗呢part先，因為預咗唔會一take過OK，所以團隊都準備咗幾套衫畀我替換，但我自己唔記得預備底褲，所以拍完淋花灑後，同事就要漏夜跑去便利店幫我買底褲，然後先可以落街拍，真係辛苦晒。」