容天鵬九一年獲晉升為助理練馬師隸屬張定邦馬房，其後被調往苗禮德馬房擔任助理練馬師，兩季後於○一年開始協助首季在港設廄的蔡約翰。容天鵬其後一直為蔡約翰效力，直至一二年度馬季結束，一三年度馬季獲發練馬師牌照，開始練馬師生涯，容廄首季開倉取得三十七場頭馬，勝出率為百分之十一。容天鵬馬房前季取得廿八W，上季獲三十W，成績輕微冒升，但值得留意一點，就係容廄剛馬季的亞、季軍次數明顯偏少，反映此廄的搏殺準繩度甚高，有機會的戰駒較少搏失跑獲二、三名，因而投注此廄的策略，可能以單W捧場較為實際。此外，容廄上季有不少冷門頭馬出現，好似八十二倍「千金一諾」、四十六倍「運來寶寶」、三十二倍「勇敢傳說」及三十一倍「大龍騰」等，如果當中命中一至兩匹，已經可以有排玩，所以想敲冷門刀仔鋸大樹，不妨吼實容廄馬。
「酷比仔」（圖前駒）屬質高體弱馬，首季只跑一仗即贏，上季因腳患遲復出，但整季四戰獲冠亞殿各一，六月試閘後驗出流鼻血，如克服傷患，新季仍可再上。「閃耀鑽皇」有新鮮感時表現特佳，上季首兩仗得冠亞各一，季中曾小休六個月，復出首戰即勝，新季只要操練正常，季初已有捧場價值。「千金一諾」上季初試閘後流鼻血，但休養至三月復出即爆冷，其後相隔兩仗又贏，確認係匹中長途氣袋馬。